Azərbaycan, Bakı, 07 avqust / Trend , müxbir İ.Əlizadə/ Azərbaycan parlamentinin İnsan hüquqları komissiyasının sədri hesab edir ki, müxalifət partiyalarının prezident seçkisini boykot etməsi, bununla bağlı çağırışlar vətəndaşların Konstitusiyada əks olunan seçmək və seçilmək hüququnu pozur.
"Müxalifət partiyalarının öz üzvləri və elektoratının seçkidə iştirak etməsinə imkan verməməsi və onları hüquqlarından istifadə etməməyə yönəltməsi tamamilə qanuna zidd bir hərəkətdir və həmin insanların hüquqlarının pozulmasıdır", cümə axşama Trend -a parlamentin İnsan hüquqları daimi komissiyasının sədri Rəbiyyət Aslanova bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. Müxalifəti təmsil edən Müsavat, Demokrat, Klassik Xalq Cəbhəsi partiyaları, üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku seçkiləri boykot edəcəyi barədə qərar verib. Vətəndaş Həmrəyliyi, Kommunist, Böyük Quruluş partiyaları isə seçkidə öz namizədi ilə çıxış etməyəcək. Milli İstiqlal, Açıq Cəmiyyət, Sosial Demokrat partiyaları və "Azərbaycan Naminə" İctimai Forumun prezidenti Eldar Namazov yaxın günlərə qərar verəcəklər.
Ümid Partiyasının sədri İqbal Ağazadənin, Müasir Müsavat Partiyasının sədri Hafiz Hacıyevin, Liberal Demokrat Partiyasının sədri Fuad Əliyev, Bütöv Azərbaycan Xalq Cəbhəsi Partiyasının sədri Qüdrət Həsənquliyevin namizədliyi təmsil olunduqları partiyalar tərəfindən rəsmən irəli sürülüb.
Hakim Yeni Azərbaycan Partiyası hazırki dövlət başçısı İlham Əliyevin namizədliyini irəli sürüb.
Təşəbbüs qrupu tərəfindən namizədliyi irəli sürülən Yaşıllar Partiyasının sədri Mais Güləliyevdir.
Öz namizədliyini irəli sürənlər isə işsiz Yaşar Əhmədov, təqaüdçü Əlimuxtar Əkbərov, Sumqayıt Mərkəzi Xəstəxanasının sanitarı Sevinc Quliyeva, həkim Vüqar Seyidov, Milli Elmlər Akademiyasının Fizika İnstitutunun elmi işçisi Qüdrət İsaqovdur.
Komissiya sədri hesab edir ki, cəmiyyətdə nüfuzunu və siyasi proseslərin aktiv subyekti olmaq imkanını itirmiş qüvvələr öz fəaliyyətlərini Azərbaycan vətəndaşlarının Konstitusiyada əks olunan əsas hüququnun pozulmasına yönəldiblər.
Bununla yanaşı, Aslanova bildirib ki, müxalifətin prezident seçkisini boykot etməsi vətəndaşların siyasi fəallığına və səsvermədə iştirakına ciddi təsir göstərməyəcək.
"Müxalifət ötən beş il ərzində fəaliyyəti və gördüyü işlər barədə cəmiyyətə hesabat verə bilmirsə, seçicilər onlara necə inana və çağırışına səs verə bilər? Cəmiyyət yaxşı bilir ki, müxalifətin prezident seçkisini boykot etməsi onların şəxsi ambisiyaları ilə bağlıdır", - komissiya sədri əlavə edib.
Aslanovanın fikrincə, seçicilər hansısa qüvvələrin onların hüquqlarını məhdudlaşdırmasına imkan verməməlidirlər: "Mən seçicilərə müraciət edirəm ki, onlara verilən hüquqdan istifadə etsinlər. Çünki vətəndaşların hüquqlarının təminatçısı Azərbaycan dövlətidir. Hər bir vətəndaşı oktyabrın 15-də səsvermədə fəal iştirak etməyə və görülən işləri düzgün qiymətləndirməklə seçm etməyə çağırıram".
Seçkini boykot edən "Azadlıq" blokunun həmsədri Əli Əliyev isə Trend -a bildirib ki, onların qərarı vətəndaşların hüquqlarını pozmur.
"Biz vətəndaşların seçki hüququnun təmin olunmasında və siyasi maarifləndirmənin yüksəldilməsində maraqlıyıq. Vətəndaşların hüquqlarını daha çox hakimiyyət məhdudlaşdırır", - Əliyev əlavə edib.
Məqalə müəllifi ilə əlaqə ünvanı: [email protected]