Azərbaycan, Bakı, 20 avqust / Trend müxbir C.Babayeva/ Azərbaycanın müxalifət partiyalarının Demokratik Seçki Mərkəzinin (DSM) formatı dəyişdiriləcək.
"DSM-də təmsil olunan və prezident seçkisində iştirak etmək barədə qərar qəbul etmiş partiyaların Mərkəzdə iştirakı qeyri-mümkündür. Mərkəz seçkini boykot etmiş partiyaların əməkdaşlıq mərkəzinə çevriləcək", çərşənbə günü Trend -a DSM-də təmsil olunan Klassik Xalq Cəbhəsi Partiyasının Ali Məclisinin sədri Zəlimxan Məmmədli məlumat verib.
Trend -un arayışı: Bu ilin yanvarında doqquz müxalifət partiyası - Klassik Xalq Cəbhəsi Partiyası, Azadlıq, Milli-Demokrat, Böyük Quruluş, Bütöv Azərbaycan Xalq Cəbhəsi, Böyük Azərbaycan, Açıq Cəmiyyət, Təkamül və Yaşıllar Partiyası Demokratik Seçki Mərkəzinin yaradılması barədə qərar qəbul edib. Bütöv Azərbaycan Xalq Cəbhəsi Partiyasının sədri Qüdrət Həsənquliyev və Yaşıllar Partiyasının sədri Mais Güləliyev prezidentliyə namizədliklərini irəli sürüblər. Mərkəzdə təmsil olunan digər yeddi partiya isə prezident seçkisində iştirak etməmək barədə qərar qəbul edib.
Məmmədlinin fikrincə, DSM kifayət qədər uğurlu və prinsipial mövqe tutmayıb. "Müəyyən məqam üçün yaradılmış Mərkəz əsas məqsədlərinə - Seçki Məcəlləsi və seçkiqabağı şəraitin demokratikləşdirilməsinə nail ola bilmədi", - deyə o bildirib.
Azərbaycanın Yaşıllar Partiyasının (AYP) sədri, prezidentliyə namizəd Güləliyevin Trend -a bildirdiyinə görə, partiya DSM-dən uzaqlaşdırılarsa, heç bir problem yaranmayacaq. "Avqustun əvvəlində Mərkəzdə təmsil olunan partiyaların DSM-in gələcək fəaliyyəti barədə qərar qəbul edəcəyi gözlənilirdi. Lakin partiyaların iş qrafiki müzakirələrin baş tutmamasına səbəb olub", - deyə Güləliyev bildirib.
İstənilən qurumda əməkdaşlığın tərəfdarı olduğunu bildərən Güləliyev AYP DSM-dən kənarlaşdırılacağı halda, buna heç təəssüflənməyəcəyini bildirib.
Məqalə müəllifi ilə əlaqə ünvanı: [email protected]
