Azərbaycan, Bakı, 07 oktyabr/ Trend , müxbir V.Javoronkova/ Zərurət yarandığı halda, Sara Peylinin prezident səlahiyyətlərinin öhdəsindən gəlməyə hazır olmaması, çətin ki, respublikaçılar partiyasından namizəd Con Makkeynin prezident kampaniyasına təsir göstərsin.
ABŞ vitse - prezidentliyinə namizədlər Sara Peylin və Cozef Baydenin ötən həftənin cümə günü keçirilən debatları, Peylinin dəfələrlə uğursuz müsahibələr verməsi, amerikalıları düşünməyə məcbur edə bilər - Peylin prezident vəzifəsini tutarsa nə baş verəcək?
Birləşmiş Ştatların Konstitusiyasına əsasən, prezident vəfat edərsə, istefaya gedərsə və ya fiziki və ya əqli baxımdan öz səlahiyyətlərini icra etməyə qadir olmazsa, vitse-prezident - hazırki vəziyyətdə Peylin bu səlahiyyətləri öz üzərinə götürür. Prezidentin sağlamlığı ilə bağlı problemlər yaranarsa, o, əmək qabiliyyətini bərpa edənədək vitse-prezident onun səlahiyyətlərinin icraçısı olur.
Makkeyn bu il keçirləcək seçkilərdə qələbə qazanarsa, ABŞ - ın ən yaşlı prezidenti ola bilər. İnaqurasiya zamanı onun 72 yaşı olacaq və bu, Peylinin dövlət başçısı vəzifəsini tutmalı olacağı ehtimalını artırır.
Usatoday saytında dərc olunmuş sorğuya əsasən, amerikalıların 23 faizi hesab edir ki, Makkeynin yaşı onun prezidentliyinə mane olacaq, amerikalıların 65 faizini onun yaşı narahat etmir.
Ekspertlərin rəyinə görə, vitse - prezidentliyə namizəd bu vəzifəyə hazır deyil.
Amerikalı politoloq Con Pitninin (John J.Pitney) rəyinə görə, onun səriştəliliyi zamanın məsələsidir. Pitninin rəyinə görə, Makkeyn qələbə qazanarsa, güman ki, Peylin keçid dövrü ərzində vitse - prezidentliyə hazırlığa çox vaxt sərf edəcək. Lakin o, yanvarın 20 - də inaqurasiyadan dərhal sonra dövlət başçısı vəzifəsini tutmalı olsaydı, onun ciddi problemləri yarana bilərdi, - Klermont MakKen kollecinin professoru, "The Art of Political Warfare" kitabının müəllifi Pitni elektron poçtla Trend - a bildirib. Politoloqun rəyinə görə, gözlənilməz bir şey baş verməzsə, Peylinin siyasətin incəliklərinə varmaq və dünya liderləri ilə ünsiyyət saxlamaq üçün kifayət qədər vaxtı olacaq.
Digər amerikalı politoloq Keri Kovinqtonun (Cary R. Covington) rəyinə görə, prezident vəzifəsinə hazırlaşmaq üçün Alyaska ştatının qubernatoru Peylinə ən azı hazırki vəzifəsində siyasi sahədə 6 -8 il iş təcrübəsi lazımdır. Yova Univeristetinin siyasi elmlər professoru Kovinqtonun rəyinə görə, buna baxmayaraq, yadda saxlamaq lazımdır ki, Harri Trümen prezidentliyə hazır olmasa da, gözəl prezident olub.
Respublikaçıların uğursuzluqları ilə eyniləşdirildiyi üçün reytinqinin artıq aşağı olması ilə yanaşı, Peylinin o qədər də peşəkar olmaması və prezident ola biləcəyi qorxusu Makkeynin daha bir zəif cəhəti olsa da, ekspertlər bunun seçicilərin səsverməsinə təsir etməyəcəyi barədə eyni rəydədirlər.
Pitninin rəyinə görə, Alyaska ştatının qubernatoru Peylin respublikaçılar arasında ruh yüksəkliyini artırır. Seçkilər üzrə məşhur amerikalı ekspert Piter Şeynin (Peter Shane) rəyinə görə, o, Makkeynin reytinqini bundan sonrakı azalmadan
qoruyur.
Pitninin rəyinə görə, Makkeyn seçkilərdə uduzarsa, səbəblər çox olacaq: səbatsız iqtisadiyyat, İraqda uzun sürən müharibə və kifayət qədər populyar olmayan hazırki prezident. Bu amillər Respublikaçılar partiyasından namizədin kimliyindən asılı olmayaraq, seçkilərdə qələbə üçün ona, demək olar ki heç bir şans saxlamır, - Ohayo Univeristetinin professoru Şeyn elektron poçtla Trend - a bildirib. "Beləliklə, məğlubiyyətdə Peylin günahkar olmayacaq", - Şeylin əlavə edib.
Müəlliflə əlaqə saxlamaq üçün elektron ünvan: [email protected]
