Fransa, Strasburq, 28 oktyabr / Trend , müxbir A. Məhərrəmli / Noyabrın 19 - 20 - də Gürcüstanın paytaxtı Tbilisidə Avropa Şurasının Nazirlər Komitəsinə sədrlik edən İsveç hökumətinin təşəbbüsü və Gürcüstan Xarici İşlər Nazirliyinin əməkdaşlığı ilə "Cənubi Qafqazda ədliyyə və qanunun aliliyi: görülən işlər və ədliyyə işçiləri qarşısında duran vəzifələr" mövzusunda regional konfrans keçiriləcək. Bu barədə Trend -a çərşənbə axşamı AŞ İnsan Hüquqları və Hüquqi Məsələlər Baş Direktorluğundan məlumat verilib.
Sözügedən konfransda AŞ Baş Katibinin müavini, xanım Mod de Bur Bukikio, İsveçin Əmək naziri, AŞ İnsan Hüquqları və Hüquqi Məsələlər Baş Direktorluğunun rəhbəri, hər üç ölkənin Ədliyyə nazirləri, Ali və Konstitusiya Məhkəməsi sədrləri, Baş Prokurorları, Ombudsman aparatının rəhbərləri, Vəkillər Assosiasiyasının Prezidentləri, eləcə də ədliyyə və məhkəmə sahəsində çalışan qərar qəbuledici və yüksək vəzifəli nümayəndələrinin iştirakı gözlənilir.
Konfransın əsas məqsədi hər üç ölkədə qanunun aliliyi prinsipinə dəstək vermək və bu sahədə aparılacaq islahatlarda əsas elementlərin müəyyənləşdirilməsi olduğu bildirilir.