Azərbaycan prezidenti İlham Əliyev çərşənbə günü "Azərbaycan Respublikası milli təhlükəsizlik orqanlarının 90 illiyi" Azərbaycan Respublikası yubiley medalının təsis edilməsi haqqında Qanunun tətbiq edilməsi barədə fərman imzalayıb,- məlumatı AzərTAc dövlət informasiya agentliyi yayıb.
Fərmana əsasən, Nazirlər Kabineti qüvvədə olan qanunvericilik aktlarının Qanuna uyğunlaşdırılması barədə təkliflərini bir ay müddətində Prezidentə təqdim etməlidir.
Azərbaycan Respublikasının 2008-ci il 2 dekabr tarixli Qanunu ilə təsdiq edilmiş "Azərbaycan Respublikası milli təhlükəsizlik orqanlarının 90 illiyi (1919-2009)" Azərbaycan Respublikasının yubiley medalı haqqında Əsasnamə"nin 2-ci bəndində nəzərdə tutulmuş "müvafiq icra hakimiyyəti orqanı"nın səlahiyyətlərini Milli Təhlükəsizlik Nazirliyi həyata keçirəcək. Fərman dərc edildiyi gündən qüvvədədir.