Azərbaycan, Bakı, 05 mart / Trend , müxbir A.Hüseynbala /
Azərbaycanın iqtidaryönlü partiyası Konstitusiyaya təklif olunan əlavə və dəyişikliklərlə bağlı hakim partiyanın təsis etdiyi təşviqat qrupu ilə birgə referendumqabağı təbliğat kampaniyasında iştirak edir.
"Biz Yeni Azərbaycan Partiyasının təsis etdiyi "Yeni Azərbaycan" təşviqat qrupunun Bakıda və ölkənin müxtəlif regionlarında keçirilən bütün tədbirlərinə dəstək vermək haqda qərar vermişik", - cümə axşamı Trend -a Demokratik Azərbaycan Dünyası Partiyasının (DADP) sədri Məmməd Əlizadə bildirib.
Тrend Nеws-un arayışı: Azərbaycanda referendumla bağlı təsis edilən təşviqat qrupları fevralın 18-dən etibarən təbliğat kampaniyasına start veriblər.
Mərkəzi Seçki Komissiyasının qərarı ilə həftə ərzində bir dəfə 90 dəqiqə İctimai Televiziyada, 90 dəqiqə isə İctimai Radioda efir vaxtı müəyyənləşdirilib.
Televiziyada efir vaxtı saat 18:15-dən, radioda isə saat 20:15-dən etibarən başlayacaq.
Təşviqat kampaniyası zamanı bütün təşviqat qrupları üçün həm televiziyada, həm də radioda dörd dəfə pulsuz efir vaxtı ayrılacaq.
Referendumla bağlı qəbul olunmuş təqvim planına əsasən, təbliğat kampaniyası martın 16-da saat 24:00-da başa çatdırılmalıdır.
Martın 18-də Azərbaycanda ölkə Konstitusiyasına əlavə və dəyişikliklərin edilməsi üzrə referendum keçiriləcək.
Referendum üzrə "Yeni Azərbaycan", "Şəhər", "Tərəqqi", "Hüquq və demokratiya", "Vətəndaş Cəmiyyəti", "Davamlı İnkişaf Naminə", "Zəka", "Qarabağ və Respublika Uğrunda Hərəkat" və "Respublikaçılar" təşəbbüs qrupları MSK-da təşviqat qrupları kimi qeydiyyata alınıblar. "Abad kənd", "Azad söz", "Azərbaycan Xalq Cümhuriyyəti" və "Milli İstiqlal" təşəbbüs qrupları qeydiyyatdan keçməyib.
Azərbaycan Konstitusiyası 1995-ci ildə qəbul olunub, 2002-ci ildə Əsas Qanuna dəyişikliklər edilib.
Əlizadənin sözlərinə görə, partiyanın bütün rayon və şəhər təşkilatlarının rəhbərlərinə martın 18-də keçiriləcək səsvermədə fəal iştirak etmək, Konstitusiya dəyişikliklərinin lehinə səs vermək barədə tapşırıq da verilib. "Biz hakim partiyanın təşviqat kampaniyasına dəstək verməklə missiyamızı yerinə yetirəcəyimizə əminik", - DADP sədri əlavə edib.
Hakimiyyətyönlü Demokratik Azərbaycan Dünyası Partiyası (DADP) 1992-ci ildə təsis olunub və 1993-cü ildə Ədliyyə Nazirliyi tərəfindən dövlət qeydiyyatına alınıb. Təşkilata Məmməd Əlizadə rəhbərlik edir. Partiya 1993-cü ildə hakimiyyətə gələn Yeni Azərbaycan Partiyasının siyasətini dəstəkləyir.
Məqalə müəllifi ilə əlaqə ünvanı:[email protected]