Azərbaycan, Bakı, 01 aprel / Trend /
İstanbulda aprelin 6-7-də keçiriləcək BMT Sivilizasiyaların Alyansı təşəbbüsünün II Qlobal Forumu çərçivəsində "Gənclər Sivilizasiyaların İttifaqı Uğrunda" beynəlxalq hərəkat təqdim olunacaq.
Alyansın Gənclər Strategiyasının qəbulu və BMT SA-nın Gənclik Məşvərət Şurasının yaradılması nəzərdə tutulub. Tədbirdə 75 ölkənin gənc liderləri təmsil olunacaqlar.
Dünyada mədəniyyətlərarası dialoq sahəsində ən ali format sayılan "Sivilizasiyaların Alyansı" üzrə keçiriləcək II Forumda Türkiyənin Baş naziri Rəcəb Tayyib Erdoğanın, İspaniyanin Baş naziri Xose Luis Rodriges Zapatero, BMT-nin Baş katibi Ban Ki Mun, Portuqaliyanin keçmiş prezidenti və Sivilizasiyaların Alyansı üzrə BMT Baş katibinin yüksək nümayəndəsi Corc Sampayo, tədbirə dəvət olunmuş 500-ə yaxın hökumət nümayəndəsi, tanınmış siyasi, elm və mədəniyyət xadimləri iştirak edəcəklər. Tədbirin ikinci günündə ABŞ Prezidenti Barak Obamanın çıxışı gözlənilir. Bu barədə İKT-nın Gənclər forumu katibliyinin press-relizində deyilir.
Sivilizasiyaların Alyansı (SA) 2005-ci ildə, Turkiyə və İspaniya baş nazirləri Erdoğan və Zapateronun birgə təşəbbüsü ilə BMT-in himayədarlığı altında təsis edilib. 2008-ci ilin yanvar ayında "Sivilizasiyaların Alyansı" üzrə I Forum İspaniyanın paytaxtı Madrid şəhərində keçirilib.
İstanbul forumu çərçivəsində aprelin 4-5-də gənclər konfransı keçiriləcək, bunun əsas məqsədi "Gənclər Sivilizasiyaların İttifaqı Uğrunda" (Youth for the Alliance of civilizations -YAOC) beynəlxalq hərəkatın BMT-nin rəsmi platforması kimi təsis edilməsidir.
Hərəkatın yaradılmasına 2007-ci ilin noyabr ayında Bakıda Heydər Əliyev Fondunun Prezidenti, UNESCO və İSESCO-nun Xoşməramlı Səfiri xanım Mehriban Əliyevanın ev sahibliyi ilə təqdimatı keçirilmiş eyni adlı konfransda təşəbbüs göstərilib.
Məqalə müəllifi ilə əlaqə ünvanı: [email protected]