Rusiya, Moskva, 22 aprel / Trend , müxbir İ.Braqina /
İslam Konfransı Təşkilatının (İKT) Gənclər Forumunun Baş katibi Elşad İsgəndərov hesab edir ki, Rusiyanın Azərbaycanlı Gənclər Təşkilatının (RAGT) yaradılması əlamətdar hadisədir.
"Bu, Rusiyada yaşayan milli azlıqların o qədər də çox olmayan təşkilatlarından biridir. Təşkilat federal səviyyədə yaradılıb və Rusiya Federasiyasının demək olar ki, bütün regionlarını əhatə edir. Bu ərazilərdə böyük işlər görülüb", - deyə İsgəndərov bildirib.
Aprelin 18-də Moskvada Rusiyanın Azərbaycanlı Gənclər Təşkilatının təsis konfransı keçirilib.
RAGT ümumrusiya miqyasında ilk milli gənclər təşkilatıdır.
Onun sözlərinə görə, RAGT-nın yaradılması Rusiya ilə Azərbaycan arasında çoxaspektli münasibətlərin inikşafında mühüm amildir. "Əminəm ki, təşkilat iki ölkə arasında əlaqələrin möhkəmləndirilməsinə xidmət edəcək", - deyə İsgəndərov bildirib.
O hesab edir ki, burada, RAGT-nın sədri seçilən Leyla Əliyeva şəxsiyyətinin yeni qurumun təşəbbüsçüsü və ideya vericisi kimi rolunu qeyd etməmək mümkün deyil.
"O gənclər siyasəti ilə təkcə Rusiya və Azərbaycanda deyil, həmçinin dünya miqyasında fəal şəkildə məşğul olur. Çoxlarına məlumdur ki, o, bu yaxınlarda BMT-nin Sivilizasiyalar Alyansı Gənclər Məşvərət Şurasına seçilib. Və mən güman edirəm ki, RAGT vasitəsilə beynəlxalq səviyyədə təkcə Rusiyadakı azərbaycanlı gənclərin inkişafı üçün deyil, ümumilikdə Rusiya gəncləri üçün, onların beynəlxalq proseslərə fəal cəlb edilməsi üçün sarsılmaz özül yaratmağa yaxşı imkanları var", - deyə İsgəndərov bildirib.
Onun sözlərinə görə, Leyla Əliyevanın təşəbbüsü ilə Avropa ölkələrini və İslam dünyasını əhatə edən bir neçə birgə aksiyalar keçirilib. "Onların sırasında ən mühümlərindən biri kimi "Xocalıya Ədalət" kampaniyasını qeyd edə bilərəm", - deyə İsgəndərov bildirib.
"Xocalıya ədalət" ("Justice for Khodjaly") Beynəlxalq İnformasiya və Təşviqat Kampaniyası İslam Konfransı Təşkilatının mədəniyyətlərarası dialoq üzrə Baş əlaqələndiricisi Leyla Əliyevanın təşəbbüsü ilə elan olunub və 2008-ci il 8 may tarixində start götürüb.
İsgəndərovun sözlərinə görə, növbəti aksiyalar sırasında Leyla Əliyevanın gələn il Bakıda BMT-nin Sivilizasiyalar Alyansının Gənclər Hərəkatının ilk qlobal konfransının keçirilməsi təşəbbüsünü vurğulamaq olar.
"Bütün bunlar Rusiyanın İslam dünyasına xüsusi marağı və onun İslam Konfransı Təşkilatında müşahidəçi statusu alması prizmasından olduqca aktualdır", - deyə o əlavə edib. İKT, tərkibinə daxil olan ölkələrin sayına görə, dünyada BMT-dən sonra ikinci təşkilatdır.
"Bu, Rusiya və İslam dünyasına, eləcə də RAGT vasitəsilə sivilizasiyalarası dialoq üzrə yeni körpülər yaratmaq üçün olduqca yaxşı əsas verir", - deyə İsgəndərov vurğulayıb.
Məqalə müəllifi ilə əlaqə ünvanı: [email protected]