Gürcüstan, Tbilisi, 06 iyul / Trend , müxbur N.Kirsxaliya /
"Rusiya ilə daha bir müharibənin olub-olmayacağı yalnız Gürcüstandan asılı deyil", - Gürcüstanın reinteqrasiya üzrə dövlət naziri Temur Yakobaşvili hesab edir.
"Müharibənin olub-olmayacağı Rusiya və ABŞ prezidentlərinin bugünkü görüşündən asılı olacaq", - o, bazar ertəsi "İmedi" telekanalının canlı yayımında deyib.
Yakobaşvili hesab edir ki, Barak Obama ilə Dmitri Medvedevin görüşü ona görə vacibdir ki, Rusiya ABŞ-dan bu məsələ üzrə konkret rəy alacaq.
Nazir hərbi əməliyyatların bərpasını istisna etmir.
"Ehtimal var, amma bu o demək deyil ki, müharibə mütləq olacaq. Ötən il bu vaxt müharibədən danışan tərəf yalnız biz (Gürcüstan) idik və heç kim, o cümlədən də Qərb bunu eşitmək istəmirdi. Bu gün isə çoxları müharibənin olacağı barədə yazırlar", - Yakobaşvili deyib.
Onun sözlərinə görə, ABŞ-ın Gürcüstanla bağlı çox dəqiq mövqeyi var və bugünkü görüşdə Gürcüstan məsələsi prinsipial şəkildə qoyulacaq.
ABŞ Prezidenti Obama bazar ertəsi Moskvaya üçgünlük rəsmi səfər gəlib.
Məqalə müəllifi ilə əlaqə ünvanı: [email protected]