Azərbaycan, Bakı, 17 avqust / Trend , müxbir C.Babayeva /
Azərbaycanın Yaşıllar Partiyası (AYP) bələdiyyə seçkisi ilə bağlı siyasi partiyalarla görüşlərə start verir.
"Bu günlərdə Ümid Partiyası ilə danışıqlar aparılacaq. Müraciət etdiyimiz 20 partiya ilə müzakirələr sentyabrın 15-nə qədər başa çatdırılacaq. Bələdiyyə seçkisi ilə bağlı digər siyasi partiyalarla birliyin yaradılması ehtimalı böyükdür", - bazar ertəsi Trend -a AYP sədri Mais Güləliyev bildirib.
Trend -un arayışı: Azərbaycanda bələdiyyə seçkisinin bu ilin dekabrında keçirilməsi nəzərdə tututlur. Azərbaycan Yaşıllar Partiyası 20 partiyaya bələdiyyə seçkisində birgə iştirak imkanlarını araşdırmaq üçün müraciət edib. 2006-cı ildə yaradılmış partiyanın dövlət qeydiyyatı olmadığına görə, seçkiyə müstəqil şəkildə qatıla bilməyəcək.
Güləliyevin sözlərinə görə, bələdiyyə seçkisi 20 minə yaxın şəxsin prosesə cəlb olunmasını tələb edir. "Yeni formalaşmış partiya kimi bütün bələdiyyələr üzrə namizəd irəli sürmək imkanımız yoxdur. Planımıza görə, seçkidə təqribən 150-200 namizədlə iştirak etmək istəyirik. Buna görə də digər partiyalarla bloklaşmağa ehtiyac var", - AYP sədri deyib.
O, müzakirələrdə müxalifət partiyaları ilə "yaşıllar" arasında mövcud ciddi fikir ayrılığının bloklaşmağa maneçilik törədəciyini bildirib. "Dağlıq Qarabağ problemindən tutmuş cəmiyyətdəki ictimai-siyasi proseslərə qədər ciddi fikir ayrılığı var. Bələdiyyə seçkisinə yanşamada da müəyyən fərqli fikirlər mövcuddur. Buna baxmayaraq, biz bəlkə də azsaylı partiyalardanıq ki, həmişə əməkdaşlığa can atırıq", - Güləliyev bildirib.
AYP sədrinin sözlərinə görə, Azərbaycanda yaşıllar ideologiyası tam möhkəmlənməyib. "Bütün partiyaların vəziyyəti kifayət qədər zəifdir, lakin onlar bunu etiraf etmirlər. Digər siyasi partiyalardan bir fərqimiz də budur ki, reallığı düzgün qiymətləndirərək öz gücümüzü açıq şəkildə bildiririk", - o deyib.
Məqalə müəllifi ilə əlaqə ünvanı: [email protected]
