Azərbaycan, Bakı, 28 aprel /Trend, müxbir A.Hüseynbala/
Azərbaycanın müxalifət partiyasının rəhbəri deyib ki, Parlament seçkilərində yüzə yaxın dairədən namizəd irəli sürmək niyyətindədirlər.
"Artıq deputatlığa qırx nəfərin namizədliyi bəllidir. Biz bu prosesi 20 gün ərzində yekunlaşdıracağıq", - çərşənbə günü Trend-ə Böyük Quruluş Partiyasının (BQP) başqanı, millət vəkili Fazil Mustafa bildirib.
Trend-in arayışı: Azərbaycanda Parlament seçkilərinin 2010-cu ilin payızında keçiriləcəyi gözlənilir. Bundanəvvəlki seçkilər 2005-ci ilin noyabr ayında keçirilib. Azərbaycanda Parlament seçkiləri majoritar sistem üzrə 125 seçki dairəsində keçirilir.
Mustafanın sözlərinə görə, indi deputatlığa namizədliyini irəli sürmək istəyənlər partiyanın rəhbərliyinə məlumat verir. "Biz həmin namizədlə birlikdə müzakirə aparıb yekun qərar qəbul edirik", - partiya sədri əlavə edib.
Parlament seçkilərində ədalət və bütöv Azərbaycan xalq cəbhəsi partiyaları ilə əməkdaşlığa gəldikdə, millət vəkili deyib ki, bununla bağlı müzakirələrin aparılması hələ tezdir: "Biz hələ ki seçkilərdə müstəqil şəkildə iştirak etmək haqda qərar vermişik. Digər partiyalarla əməkdaşlıq məsələsini seçkiərəfəsi müzakirə edə bilərik", - Mustafa vurğulayıb.
Ədalət Partiyası bir müddət əvvəl Parlament seçkilərində böyük quruluş və bütöv Azərbaycan xalq cəbhəsi partiyaları ilə birgə iştirak etmək haqda təşəbbüslə çıxış edib.
Müxalifətyönlü Böyük Quruluş Partiyası 2004-cü ildə yaradılıb, 2005-ci ildə dövlət qeydiyyatına alınıb. Partiyanın sədri Fazil Mustafa (Fazil Qəzənfəroğlu) Milli Məclisin deputatıdır. Partiya sədri 2008-ci ildə keçirilən prezident seçkisində namizəd olub və 2,4 faiz səs toplayıb.
