Azərbaycan, Bakı, 30 avqust /Trend, müxbir T.Hacıyev/
Azərbaycanın müxalif Vətəndaş və İnkişaf Partiyasında yaxın zamanlarda yeni təyinatların olacağı gözlənilir. Bu barədə bazar ertəsi Trend-ə VİP sədri Əli Əliyev bildirib.
"Şənbə günü partiyanın siyasi şurasının iclası keçirilib. İclasda sentyabrın 5-də partiya Ali Məclisinin çağırılması barədə qərar qəbul olunub. Ali Məclisin iclasında seçkilərlə bağlı bir sıra məsələlər və partiyada yeni təyinatlar məsələsi müzakirə olunacaq", - Əliyev əlavə edib.
Azərbaycanda Parlament seçkilərinin 2010-cu ilin noyabr ayının 7-də keçiriləcəyi gözlənilir. Bundanəvvəlki seçkilər 2005-ci ilin noyabr ayında keçirilib. Azərbaycanda Parlament seçkiləri majoritar sistem üzrə 125 seçki dairəsində aparılır.
Onun sözlərinə görə, yeni təyinatlar seçkiöncəsi partiyanın mövqelərinin gücləndirilməsi üçün nəzərdə tutulub: "Bundan əlavə, məclisdə blok məsələsi ilə bağlı da bir sıra qərarların qəbul olunacağı gözlənilir", - partiya sədri deyib.
Avqustun 25-də VİP və ALP seçki bloku yaratdıqlarını elan ediblər.
