Azərbaycan, Bakı, 14 oktyabr /Trend, müxbir S.Süleymanov/
Qərbin ikili standartları Qazaxıstan hökumətinə xaricə qaçan məhkumları tutmağa mane olur. Bu barədə cümə axşamı Astanada keçirilən brifinqdə beynəlxalq işlər, müdafiə və təhlükəsizlik üzrə Məclis komitəsinin sədri Amzebek Jolşibekov deyib.
"Siz çox gözəl bilirsiniz ki, Qazaxıstanın bizim qanunlara görə həbs-qətimkan tədbiri seçilən və ölkə xaricində yaşayan vətəndaşları var. Bu cinayətlərə tətbiq olunan ikili standartlara görə, onlar hələ də azadlıqdadırlar", - ATƏT-in Parlament Assambleyasının payız sessiyasından qayıdan Jolşibekov deyib.
Ədalət məhkəməsindən xaricə qaçan qazaxıstanlıların soyadlarını Jolşibekov dəqiq açıqlamayıb.
"Mən Oslo və Vyanada rəsmi çıxışlarımda dəfələrlə ikili standart siyasətindən əl çəkmək vaxtının gəlib çatdığını vurğulamışam. Bizim məhkəmə tərəfindən sübut olunmuş cinayətlər müxtəlif səbəblərə görə dəstəklənmir, bu isə bizi mütəəssir edir", - o deyib.
ATƏT-in Parlament Assambleyasının növbəti sessiyası İtaliyanın Palermo şəhərində təşkil olunub. Sessiyada transmilli cinayətkarlığın təşkili və korrupsiya ilə mübarizə kimi vacib məsələ də müzakirə olunub.
Eyni zamanda, jurnalistlərin "Palermoda hansı konkret qərarlar qəbul olunub" sualını cavablandıran deputat Jolşibekov Qərbin bir sıra Qazaxıstan təklifləri ilə bağlı ikili standartlarından şikayətlənib.
Həmçinin, o vurğulayıb ki, ATƏT-in Parlament Assambleyasında bir qayda olaraq qanunlar qəbul olunmur, yalnız mülahizələr yürüdülür.