Azərbaycan, Bakı, 26 oktyabr /Trend, müxbir T.Hacıyev/
Azərbaycanın müxalif Xalq Cəbhəsi (AXCP) və Müsavat partiyaları kütləvi aksiyalar keçirməklə bağlı məsləhətləşmələr aparırlar. Bu barədə çərşənbə axşamı Trend-ə Müsavat Partiyasının mərkəzi icra aparatının rəhbəri Arif Hacılı bildirib.
Onun sözlərinə görə, yaxın günlərdə kütləvi aksiyaların keçirilməsi ilə bağlı qərar qəbul olunacaq. Hacılı qeyd edib ki, müzakirələr Klassik Xalq Cəbhəsi Partiyası (KXCP) ilə də aparılır.
AXCP-Müsavat siyasi partiyalar bloku oktyabrın 17-ə mitinq təyin etsə də, Bakı Şəhər İcra Hakimiyyəti tərəfindən mitinqin keçirilməsinə icazə verilməyib. Həmin partiyalar tərəfindən keçirilməsi nəzərdə tutulan aksiyalar parlament seçkiləri öncəsi təşviqat kampaniyasının tərkib hissəsidir.
Azərbaycanda parlament seçkisi noyabrın 7-də keçiriləcək.
