Azərbaycan, Bakı, 17 may /Trend, müxbirlər E. Tariverdiyeva, A. Bədəlova/
Avropa Komissiyası (AK) Brüsseldə Azərbaycanda vəziyyətin təhlili zamanı Avropa İttifaqı (Aİ) və Azərbaycan arasında fəaliyyət planının reallaşdırılması çərçivəsində müsbət dəyişiklikləri qeyd edib. Trend-in məlumatına görə, bu barədə jurnalistlərə Aİ-nin Bakı nümayəndəliyinin rəhbəri Roland Kobia bildirib.
"Aİ AK-də qəbul edilən məruzəni dərc edib. Məruzə fəaliyyət planının həyata keçirilməsi işində Şərq tərəfdaşlığının bütün ölkələrinin əldə etdiyi tərəqqiyə həsr edilib" , - Kobia deyib.
Səfir bildirib ki, məruzəyə əsasən, Azərbaycanda makroiqtisadi sabitlik, habelə yoxsulluğun azaldılması yolunda pul-kredit və maliyyə sabitliyi məsələlərində müsbət aspektlər qeyd edilir.
Onun sözlərinə görə, həmçinin vurğulanıb ki, son vaxtlar Aİ və Azərbaycan arasında əmtəə dövriyyəsi artıb.
Kobia Bakı və Brüssel arasında enerji əməkdaşlığının yüksək səviyyəsini, habelə mütəşəkkil cinayətkarlıq və terrorizm ilə mübarizədə əməkdaşlığı qeyd edib.
"Biz ölkəni bu sahədəki işə görə təbrik edirik. Həmçinin, ölkədə korrupsiya ilə mübarizə davam edir, lakin hələlik bu istiqamətdə çox işlər görmək lazımdır", - o bildirib.
Kobia əlavə edib ki, Aİ-nin yaxşılaşdırılmasını tövsiyə etdiyi bir neçə sahə var ki, bunlar arasında insan haqları, məhkəmə sisteminin müstəqilliyi, azad yığıncaq və assosiasiyalar institutunun təkmilləşdirilməsi, ətraf mühitin yaxşılaşdırılması və azad KİV, habelə qeyri-hökumət təşkilatları sahəsində qanunvericiliyi göstərmək olar.
O bəyan edib ki, Aİ Venesiya Komissiyası ilə birlikdə Ümumdünya Ticarət Təşkilatına daxil olmaq məsələsi üzrə Azərbaycanın tərəqqisini görür və bu sahədə ölkənin uğuruna inanır.