Azərbaycan, Bakı, 4 fevral /Trend, müxbir A.Tağıyeva/
Yaxın aylarda Səudiyyə Ərəbistanının bir sıra yüksək vəzifəli məmurlarının Azərbaycana rəsmi səfərləri gözlənilir. Bu barədə bazar ertəsi Krallığın Bakıdakı səfiri Fəhd bin Əli əl-Düsəri Azərbaycanda diplomatik missiyasının başa çatması ərəfəsində Trend-ə müsahibəsində bildirib.
Onun sözlərinə görə, martda Səudiyyə Ərəbistanının yüksək rütbəli məmurlarının Azərbaycana iki rəsmi səfəri gözlənilir. Habelə martda ölkənin Sərhəd korpusunun rəhbərinin Azərbaycana səfəri baş tutacaq. O, Azərbaycanın Dövlət Sərhəd Xidmətinin rəhbəri Elçin Quliyevlə görüşəcək.
Səfir bildirib ki, apreldə Səudiyyə Ərəbistanı hökuməti yanında Baş Audit Bürosunun rəhbəri Üsamə bin Cəfər əl-Faqih Azərbaycana səfər edəcək.
Səudiyyə Ərəbistanı ilə Azərbaycan arasında əlaqələrin səviyyəsinə gəldikdə əl-Düsəri qeyd edib ki, ölkələr arasında qardaş, eləcə də dostluğa və qarşılıqlı anlaşmaya əsaslanan münasibətlər mövcuddur.
"Ölkələrimiz arasında müxtəlif sahələrdə sıx əməkdaşlıq mövcuddur. Azərbaycan və Səudiyyə Ərəbistanı İslam Əməkdaşlığı Təşkilatının üzvləridir. Hər iki ölkə gələcəkdə qarşılıqlı münasibətlərin möhkəmlənməsi üçün əlindən gələni edir. Ölkələrimiz arasında əlaqələrin inkişafı şübhəsiz ki, dövlət başçılarının - Prezident İlham Əliyevin və Kral Abdullahın səylərinin nəticəsidir", - səfir bildirib.
Diplomat mədəniyyət və təhsil sahəsində ölkələrin əməkdaşlığını xüsusi qeyd edib.
Əl-Düsəri onu da bildirib ki, Səudiyyə Ərəbistanı Azərbaycanın ərazi bütövlüyünü dəstəkləyir. O deyib ki, bu, Səudiyyə Ərəbistanının heç vaxt dəyişməyəcək rəsmi mövqeyidir.
"Krallıq Dağlıq Qarabağ münqaişəsi ilə bağlı qəbul edilmiş bütün beynəlxalq qətnamələri dəstəkləyir. Səudiyyə Ərəbistanı gələcəkdə də bu münaişədə Azərbaycanın mövqeyini dəstəkləyəcək", - əl-Düsəri bildirib.
