...

Emin Hacıyev: Xalq-iqtidar birliyi Azərbaycanın sabitliyinin, inkişafının qarantıdır

Siyasət Materials 11 Aprel 2020 12:07 (UTC +04:00)
Emin Hacıyev: Xalq-iqtidar birliyi Azərbaycanın sabitliyinin, inkişafının qarantıdır

Bakı. Elçin Mehdiyev - Trend:

Bu gün Azərbaycanın dinamik, ardıcıl inkişafının əsasında düşünülmüş siyasi qərarlar dayanır. Dövlət başçısı cənab İlham Əliyevin müəyyən etdiyi siyasi xətt, ortaya qoyduğu siyasi iradə hər şeydən öncə Azərbaycan vətəndaşının xoşbəxtliyinin, rifahının təmin olunmasına xidmət edir. Yeni Azərbaycan Partiyası bu siyasi strategiyanın uğurla realizə olunmasında aparıcı qüvvə kimi çıxış edir.

Bunu Trend-ə Milli Məclisin deputatı Emin Hacıyev deyib.

E.Hacıyev qeyd edib ki, 1990-cı illərin əvvəllərində Azərbaycanda xeyli sayda siyasi partiya, ictimai birlik və hərəkatlar mövcud idi:

“Ancaq bu siyasi qüvvələr ictimaiyyətin mütləq əksəriyyətinin dəstəyini qazana bilməmişdi. Ölkə siyasi və iqtisadi kataklizmlər, olduqca dərin böhran içərisində idi, bütün sahələrdə xaos hökm sürürdü, digər bir tərəfdən cəbhə xəttindəki uğursuzluqlar, ermənilərin Azərbaycan ərazilərini işğal etməsi, sosial problemlər, sabitliyin təmin edilə bilməməsi yeni siyasi hərəkatın önə çıxmasını və prosesləri idarə etməsini zəruri edirdi.

Həmin dövrdə nəinki ölkənin inkişaf perspektivi görünmürdü, xalq olaraq bir əsrdə ikinci dəfə qazandığımız müstəqilliyi itirmək təhlükəsi ilə üz-üzə qalmışdıq. Başqa sözlə, xalqı öz ətrafında birləşdirən və səfərbər edən yeni bir siyasi hərəkata ehtiyac var idi. Bu hərəkatı dahi siyasətçi, ulu öndər Heydər Əliyev yaratdı.
Xalq gördü ki, çıxış yolu vətənini sevən dahi liderin hakimiyyətə qayıdışıdır, əks halda ölkə uçuruma doğru gedir. Məhz bu baxımdan 1992-ci ildə Naxçıvanda ulu öndər Heydər Əliyevin sədrliyi ilə Yeni Azərbaycan Partiyasının təsis edilməsi, daha sonra isə xalqın tələbi ilə ulu öndərin hakimiyyətə qayıdışı tarixi hadisə idi. Biz tarixin sonrakı mərhələlərində - ölkəmizin bütün sahələrdə əldə etdiyi uğurlara, Azərbaycanın dünyanın ən dinamik inkişaf edən ölkələrindən birinə, beynəlxalq siyasi münasibətlərdə mühüm aktora çevrilməsinə baxdıqda bu hadisənin nə qədər tarixi əhəmiyyət kəsb etdiyini görürük”.

Millət vəkili bildirib ki, bu gün Azərbaycan çoxpartiyalı sistemin, demokratik dəyərlərin möhkəmləndiyi ölkələrdəndir:

"Bu gün siyasi hakimiyyət müxalifətlə dialoq təşkil edir. Kimlərsə bu dialoqdan qaçırsa, deməli konstruktiv əməkdaşlıqda maraqlı deyil. Beşinci kolonun nümayəndələri xaricdən, Azərbaycanın inkişafını istəməyən qüvvələrdən aldıqları dəstəklə təxribatlar, qarşıdurmalar yaratmaqda maraqlıdırlar, bunun üçün hər şeyi etməyə hazırdırlar. Amma unudurlar ki, bu gün ölkəmizdə mövcud olan xalq-iqtidar birliyi Azərbaycanın sabitliyinin, inkişafının qarantıdır. Azərbaycan dövləti istənilən vəziyyətdə öz vətəndaşının yanındadır".

Məqalədə:
Xəbər lenti

Xəbər lenti