...

Emin Hacıyev: Orta məktəblərdə xarici dillər əlçatan olmalıdır

Siyasət Materials 12 Sentyabr 2020 19:40 (UTC +04:00)
Emin Hacıyev: Orta məktəblərdə xarici dillər əlçatan olmalıdır

Bakı. Trend:

Orta məktəblərdə xarici dillər əlçatan olmalıdır.

Bunu Trend-ə Milli Məclisin deputatı Emin Hacıyev deyib.

E.Hacıyev bildirib: "Çoxdilli gənclərin yetişdirilməsi, xüsusilə orta təhsil sistemində xarici dillərin xüsusi əhəmiyyətə malik olması yaşadığımız dövrün prioritetlərindəndir.

Karyera inkişafı asan əldə olunmur, bu yolda daha təcrübəli insanlar, daha bilikli insanlar daha böyük uğur qazanır, daha çox şey öyrənə bilirlər. Mütəxəssislər bu uğurun düsturunda xarici dil bilgisini xüsusi qeyd edirlər".

Onun sözlərinə görə, ikinci daha mühüm bir məqam onunla bağlıdır ki, hər bir insana beynəlxalq aləmin qapılarını açan da məhz xarici dildir: "Bu gün Azərbaycanın beynəlxalq imicinin daha da möhkəmləndirilməsi yönündə vacib addımların atılması baxımından yanaşsaq, bizim az qala hər birimizin müxtəlif xarici dilləri mükəmməl bilməyimizə nə qədər böyük ehtiyac olduğunu görərik. Bu mənada rus və ingilis dillərinin öyrənilməsi üçün orta və ali təhsil daha da təkmilləşdirilməlidir".

Deputat qeyd edib ki, rusdilli, ingilisdilli, türkdilli məktəblərin və ya məktəblərdə siniflərin olması, azərbaycanlıların əlavə olaraq fars, gürcü, ispan, fransız və alman dillərini də bilməsi vacib və qaçılmazdır:

"Çox mühüm suallar var- bu gün bizim dünyada nə qədər ingilisdilli, ermənidilli, rusdilli jurnalistimiz var? Bu gün bizim xarici arxivlərdə işləyə biləcək nə qədər çoxdilli mütəxəssisimiz var? və s.

Başqa bir məqama da diqqət edək. İsraildə xarici dil öyrənməyin yaşla bağlı olub-olmadığını müəyyən etmək üçün bir araşdırma aparılıb. Aparılan araşdırmada xarici dil öyrənən insanlar içərisində yaşı 14-lə 21 arasında olanlar 12 yaşı olanlardan daha yaxşı nəticə göstəriblər. Yaşı 12 olanlar isə xarici dili yaşı 8 olanlardan daha tez mənimsəyiblər.
İngiliscə öyrənən ispanlar da təxminən eyni nəticəni göstəriblər.

Gəlinən qənaət odur ki, xarici dil öyrənməyin yaşı yoxdur. Əsas odur ki, insan öyrənmək istəsin.

Demək, biz nəinki yeni nəslin müxtəlif dilləri öyrənməsini təmin etməliyik, hətta bəzi sahələrdə çalışan, müəyyən yaş dövrünə çatmış peşəkarların xarici dilləri öyrənməsinə təkan verməliyik. Yaşadığımız dövr qeyri-ixtiyari olaraq çoxdilliliyi peşəkarlığın əsas şərtlərindən birinə çevirib.

Bu sahədə sistemin qurulması, imkansız ailələrin övladlarının xarici dil bilgilərinin artırılmasının, ixtisaslaşmış xarici dil məktəblərində və siniflərdə dövlət hesabına təhsil almasının təşkili isə artıq müvafiq qurumların işidir".

Məqalədə:
Xəbər lenti

Xəbər lenti