Bakı. Trend:
Emmanuel Makronun beynəlxalq hüququ anlamağı məsələsi mübahisəlidir. Çünki Fransanın məhz Makron hakimiyyəti dövründə sərgilədiyi davranışlar bütövlükdə beynəlxalq hüququn norma və prinsiplərinə ziddir. Əgər belə olmasa idi, o zaman Azərbaycanın BMT Təhlükəsizlik Şurasının qətnamələri və BMT nizamnaməsinə uyğun olaraq sərgilədiyi davranışlar, həmçinin, beynəlxalq səviyyədə tanınmış ərazilərini 30 ilə yaxın davam edən işğaldan azad etməsi Makron hakimiyyəti tərəfindən qəzəblə qarşılanmaz və faktiki olaraq Fransa Parlamentinin hər iki palatası hansısa qondarma təsisatın tanınması istiqamətində kağız parçaları qəbul etməzdi.
Bunu Trend-ə açıqlamasında Milli Məclisin deputatı Elçin Mirzəbəyli deyib.
Deputat vurğulayıb ki, Fransa bugünədək üzərinə götürdüyü heç bir öhdəliyi yerinə yetirməyib:
“Fransanın bu gün təkcə Cənubi Qafqazda deyil, qlobal miqyasda da sərgilədiyi mövqenin beynəlxalq hüququn norma və prinsiplərinə hər hansı formada aidiyyəti yoxdur. Əslində, Fransa BMT Təhlükəsizlik Şurasının daimi üzvü kimi təkcə veto hüququna malik olmaq üçün üstünlük əldə etmir, eyni zamanda, bu təsisatın üzvü kimi məsuliyyət daşıyır. Lakin dənizaşırı ərazilər adlandırdığı, müstəmləkə kimi qoruyub saxladığı ərazilərdə insan hüquq və azadlıqlarının təmin edilməsi ilə bağlı heç bir addım atmayıb.
Əslində, müstəmləkəçiliklə bağlı qəbul edilən normalar Fransanın çoxdan öz müstəmləkələrindən əl çəkməsinin zəruriliyini ortaya qoyur. Amma Fransa dünyada barmaqla sayılacaq ölkələrdəndir ki, xalqları, öz torpaqlarından on minlərlə kilometr kənarda yerləşən əraziləri istismar etməkdə davam edir və onların azadlıqlarını tanımaq istəmir”.
Elçin Mirzəbəyli Azərbaycanın qlobal miqyasda üzərinə götürdüyü öhdəliklərə uyğun davrandığını bildirib:
“Yeni Kaledoniya məsələsinə gəldikdə isə, bu, Azərbaycanın beynəlxalq hüququn subyekti, məsuliyyətini qlobal səviyyədə dərk edən ölkə kimi həyata keçirdiyi missiya və üzərinə götürdüyü öhdəliklərdən irəli gəlir. Yəni Fransa öz məsuliyyət və öhdəliklərini Makronun timsalında dərk etmirsə, Azərbaycan bunu dərk edir və o öhdəliklərə uyğun davranır. Azərbaycan Qoşulmama Hərəkatının üzvü kimi də müstəmləkəçilik siyasətinə qarşı qlobal miqyasda öz mövqeyini sərgiləyir”.
Millət vəkili Fransanın Avropa İttifaqının üzvü olduğu halda, öz koloniyalarının ərazilərinin Aİ ərazisi kimi göstərilməsinə qarşı çıxdığı faktını xatırladıb:
“Avropa məkanında qəbul olunan hüquqi normalar Fransanın dənizaşırı ərazilər adlandırdığı yerlərdə tətbiq olunmur. Bu, bir daha göstərir ki, Fransa həmin ərazilərdə yaşayan sakinlərə ikinci, üçüncü dərəcəli insanlar kimi yanaşır, onların hətta Fransa vətəndaşları ilə eyni hüquqa malik olmadığını ortaya qoyur. Bu kontekstdə yürüdülən ikili standartlar, insan hüquq və azadlıqlarına qarşı həyata keçirilən siyasətə münasibət bildirmək Azərbaycanın qlobal miqyasda beynəlxalq hüququn subyekti kimi üzərinə götürdüyü öhdəlikdir və bu istiqamətdə ölkəmizin atdığı addımlar qəbul və təqdir olunmalıdır”.
Elçin Mirzəbəyli qeyd edib ki, indiki şəraitdə Fransanın sərgilədiyi mövqe Emmanuel Makronun aqressiv ritorikasının nəticəsidir:
“Fransanın Ermənistanla bağlı davranışlarının beynəlxalq hüquq, bütövlükdə insan hüquq və azadlıqlarına hər hansı formada bağlılığı yoxdur. Çünki Ermənistan 30 il ərzində Azərbaycan torpaqlarını işğal altında saxlayıb və Fransa buna dolayı yolla dəstək verib.
Beynəlxalq səviyyədə tanınan ərazilərdə Azərbaycanın suverenliyi təmin edildikdən sonra Fransanın davranışları göz qabağındadır. Fransa məhz Azərbaycan ərazilərinin işğalı, eyni zamanda, etnik ermənilərin separatizm üzərindən yürütdüyü siyasətin davam etməsini arzulayır. Çünki bu ona Cənubi Qafqaz, daha sonra isə Mərkəzi Asiyaya müəyyən təsir imkanları əldə etmək fürsəti yaradır. Beynəlxalq müstəvidə bu və ya digər məsələnin müzakirəsi Fransanın da ən müxtəlif mövzularda bu məsələni bazarlıq predmetinə çevirməsinə imkan verir. Artıq Azərbaycanın yaratdığı reallıqlar bu imkanları tamamilə əldən çıxarıb”.
Mövzuya münasibət bildirən Milli Məclisin deputatı Sevinc Fətəliyeva Trend-ə açıqlamasında deyib ki, Azərbaycanın öz ərazi bütövlüyünü və suverenliyini bərpa etməsi bölgədə yeni reallıqlar yaradıb:
“Azərbaycan Cənubi Qafqazın lideri və regionda söz sahibi olan dövlətdir. Lakin müəyyən beynəlxalq dairələr Azərbaycanın işğalçı Ermənistan üzərində qələbə qazanmasını həzm edə bilmir. Fransa bu baxımdan “öndə” gedir. Bu ölkənin başçısı Makronun səfirlər konfransında Azərbaycana qarşı səsləndirdiyi fikirlər də məhz onun uğurlarımıza qarşı qısqanclığının göstəricisidir”.
Deputat bildirib ki, Fransa Prezidenti Makron Azərbaycanın ərazi bütövlüyünü və suverenliyini təmin etməsini hələ də qəbul etmək istəmir:
“Amma onun nə istəməsindən asılı olmayaraq, dövlətimiz öz gücünə beynəlxalq hüquq normalarını, BMT Təhlükəsizlik Şurasının müvafiq qətnamələrini icra edib. Lakin rəsmi Paris öz mövqeyi ilə əslində beynəlxalq hüquq normalarına hörmətsizlik edir. Fransanın indiki mövqeyi Cənubi Qafqazda sülhə və təhlükəsizliyə böyük təhdiddir. Ermənilərin maraqları naminə bu ölkə beynəlxalq hüquqa hörmətsizlik edir, bəşəri dəyərləri ayaq altına atır. Bu, o deməkdir ki, Fransa hökuməti və parlamenti, bu ölkənin ayrı-ayrı siyasi dairələri uzun illərdir, açıq irqçi, azərbaycanofob, türkofob və islamofob fəaliyyət nümayiş etdirirlər. Bu yanaşma Fransanın dövlət siyasəti səviyyəsinə çatıb.
Eyni zamanda, Fransa parlamentinin qərarları beynəlxalq hüququn norma və prinsiplərinə zidd olmaqla Azərbaycanın ərazi bütövlüyü və suverenliyinə qarşı qərəzli və ədalətsiz addımdır. Fransa parlamenti hələ 2020-ci ilin noyabrında - Azərbaycanın Vətən müharibəsində qazandığı tarixi zəfərdən qısa müddət sonra o vaxt Qarabağdakı separatçı rejimin tanınmasının zərurəti haqqında qətnamə qəbul etmişdi.
Eləcə də, ordumuz Qarabağda erməni separatizminin kökünü kəsərək, suverenliyimizi tam bərpa etdikdən sonra rəsmi Paris ölkəmizə qarşı qərəzini daha da artırıb. Fransanın Ermənistanı silahlandırması isə Cənubi Qafqazda yeni müharibə təhlükəsi yaradır”.
Millət vəkili Sevinc Fətəliyevanın sözlərinə görə, özünü demokratiyanın beşiyi kimi təqdim etməyə çalışan Fransa bir sıra xalqlara qarşı müstəmləkə siyasəti həyata keçirir:
“Fransanın məkrli neokolonial siyasətinin təzahürü olan dənizaşırı ərazilərində apardığı uğursuz fəaliyyətin səbəblərinin Azərbaycan üzərinə yönləndirilməsi isə Parisin yanlış siyasətindən xəbər verir. Azərbaycan müstəmləkəçilik və neokolonializmə qarşı mübarizə aparan xalqları dəstəkləyir. Dövlətimiz bu mövqeyini bütün beynəlxalq platformalarda bəyan edib.
Azərbaycan bu məsələdə prinsipial mövqe nümayiş etdirir və Fransanın müxtəlif xalqlara qarşı repressiv siyasətinə etiraz səsini ucaldır. Eyni zamanda, müstəmləkəçiliyə qarşı aparılan mübarizəyə siyasi və mənəvi dəstək verilir. Bakı Təşəbbüs Qrupunun yaradılması da bu məqsədə xidmət edir. Ona görə də Fransa Prezidenti Makron ölkəmizi əsassız olaraq ittiham etmək əvəzinə ilk növbədə müstəmləkə altında saxladığı xalqlara qarşı repressiv siyasətə son qoymalı, həmin xalqların tələblərini yerinə yetirməlidir”.