"Bizim Azərbaycan" blokunun iclası dekabrın 4-də davam etdiriləcək

"Bizim Azərbaycan" blokunun noyabrın 30-da keçirilən növbəti toplantısında Müsavat və ona yaxın olan 8 partiya iştirak etmədiyindən blokun iclası dekabrın 4-də davam etdiriləcək". Bu barədə Trend ə adıçəkilən blokun üzvlərindən olan Türk Millətçi Partiyasının sədri Vüqar Bəyturan bildirib.

V.Bəyturan onu da qeyd edib ki, blokun koordinatoru olan Xalq Azadlıq Partiyasının sədri Valeh Mirzəyev iclasdan öncə Müsavat başqanı İsa Qəmbərlə danışıqlar aparıb: "İsa Qəmbər blokun fəaliyyət göstərməsini bildirib. Ancaq onun iclasa qatılmaması bir qədər qaranlıq qalıb".

Partiya sədri vurğulayıb ki, noyabrın 30-da keçirilən iclasda blokun əsasnaməsi müzakirə edilib: "Ölkədə baş verən son hadisələr də müzakirə obyekti olub. Yetərsay olsa da, qərara aldıq ki, iclasın davamını bu həftənin sonuna saxlayaq".