Azərbaycan Mərkəzi Seçki Komissiyasının müxalifətdən olan katibini parlamentdə azlıqda olan siyasi partiyalar seçəcəklər. Bu barədə Trend ə Mərkəzi Seçki Komissiyasının (MSK) katibi Natiq Məmmədov məlumat verib.
O, bildirib ki, bu il 13 mayda keçiriləcək təkrar paralment seçkisindən sonra Milli Məclisdə azlıq təşkil edən partiyalar (siyasi yönümündən asılı olmayaraq) öz aralarında razılaşdıraraq MSK katibi postuna vahid nümayəndələrini təyin edə bilərlər. Əgər təkrar seçkidə heç bir siyasi partiya qalib gəlməsə, onda MSK-nın katibini hazırda parlamentdə azlıq təşkil edən partiyalar seçəcəklər.
"Təkrar seçkidə yalnız bitərəf namizədlər qalib gələrsə, MSK-nın digər katibinin seçilməsi sırf hüquqi məsələ olacaq. Azərbaycan qanunvericiliyində iqtidar və müxalifət partiyaları anlayışları yoxdur, yalnız deputatlarının sayına görə parlamentdə çoxluq və azlıq təşkil edən partiyalar qruplaşdırılır. Hakimiyyətdə olmayan bütün partiyalar əslində müxalifət sayılır. Ona görə də MSK-nın digər katibi iqtidaryönlü və ya müxalifət olmasından asılı olmayaraq, həmin partiyaları təmsil edəcək"-deyə Natiq Məmmədov açıqlama verib.
