Azərbaycan Xalq Cəbhəsi Partiyasının (AXCP) "klassiklər" qanadının adı dəyişdirilərək Azərbaycan Klassik Xalq Cəbhəsi Partiyası olacaq. Bu barədə Trend ə partiyanın sədri Mirmahmud Mirəlioğlu məlumat verib. O bildirib ki, fevralın 19-da AXCP "klassiklər"in Ali Məclisinin iclası keçirilib, ölkədəki ictimai-siysai vəziyyət, partiyanın yeni adı və hüquqi statusu, qurultaya hazırlıq məsələləri müzakirəyə çıxarılıb. Partiyanın qurultayının bu il martın 26-da Bakıda keçirilməsinə qərar verilib. Qurultayın gündəliyinin layihəsi də təsdiqlənib. Partiyanın adının dəyişdirilməsi ilə bağlı bir neçə təklif müzakirəyə çıxarılıb, səsvermə zamanı "Azərbaycan Klassik Xalq Cəbhəsi Partiyası" variantı daha çox səs toplayıb. Qurultaya bu adın rəsmiləşdirilməsi tövsiyə olunub.
Ali Məclisin iclasında, həmçinin, "Vahid Azərbaycan Uğrunda İstiqlal Cəbhəsi" partiyasının AXCP "klassiklər"ə birləşməsi ilə bağlı müraciətinə baxılıb və müsbət qərar çıxarılıb. "Klassiklər"in martın 26-da keçiriləcək qurultayında yeni adda partiyanın sənədlərinin Ədliyyə Nazirliyinə təqdim olunması, dövlət qeydiyyatından keçirilməsi məsələləri də həll olunacaq. Qurultayda partiyanın sədri Mirmahmud Mirəlioğlunun hesabatı dinləniləcək, sədr postuna və Mərkəzi Nəzarət Təftiş Komissiyasına seçkilər keçiriləcək. Partiya sədrliyinə alternativ namizəd kimi hələ ki Ali Məclisin sədri Zəlimxan Məmmədli iddialıdır.
Trend-in ən mühüm və maraqlı xəbərlərini "Telegram"da izləyin
