Kür-Araz çayları boyunca havaların həddən artıq yağıntılı keçməsi, Kürün aşağı axınında çayın səviyyəsinin əvvvəlki illərdən fərqli olaraq, hələ qışın başlanğıcından qalxmasına səbəb olub. Xüsusilə Salyanda çayın səviyyəsi rayon mərkəzindən yüksəkdə olduğundan 400-dən artıq şəxsi evin həyətləri və zirzəmisi 30-40 sm dərinlikdə su ilə doludur. Həmin həyətlərdə əhalinin məişət şəraitində ciddi problemlər yaranıb. Lakin son bir həftədə çayın səviyyəsi 40 sm-dək azalıb və bu proses davam etməkdədir. Suyun səviyyəsinin daha 25-30 sm azalması isə qrunt sularının təbii yolla həyətlərdən tamamilə çəkilməsinə səbəb olacaq.
Salyan rayon fövqəladə komissiyasının sədri Etibar Hüseynovun bildirdiyinə görə, bu işlərlə əlaqədar indiyədək 35 ədəd elektrik və 1 ədəd "SMP" tipli nasos quraşdırılıb. Lakin Kürdə suyun səviyyəsinin yuxarı olması həyətlərdən qrunt sularının tamamilə çəkilməsinə imkan vermir. Buna görə də əlavə olaraq, rayon yanğından mühafizə xidmətinin 2 yanğın söndürən maşını, Əlibayramlı hərbiləşdirilmiş yanğından mühafizə xidmətinin "QMS"tipli nasos stansiyası əraziyə cəlb edilmişdir. Bundan əlavə, mülki müdafiə batalyonunun da 2 ədəd "SMP" tipli, 2 ədəd "Əndican" markalı nasosları şəhər ərazisində işləyir. Bu günə kimi 20-dən çox həyətdə qrunt suları qismən qurudulmuşdur. Şəhərə dolmuş suları axıtmaq üçün 70-ci illərdə inşa edilmiş drenaj sisteminin yenidən qurulmasının dördüncü mərhələsinin layihəsi isə Nazirlər Kabinetində təsdiq edilib və yaxın günlərdə həyata keçiriləcək.
Babazənən ərazisindən Kür çayının yeni qolunun çəkilməsi isə gələcəkdə şəhərin daşqınlardan qorunmasına səbəb olacaq. Mütəxəssislər isə bildirir ki, yaxın 10-15 gün ərzində çayda suyun səviyyəsinin düşməsinin davam etməsi nəticəsində həyətlərdən qrunt suları tamamilə çəkiləcək. Amma çaylarda sululuğun artmasının başladığı yazın gəlişi ilə əlaqədar mart ayının sonlarından may ayının axırınadək iki ay müddətində Kür boyu ərazilərin sahilə bitişik yerlərində sakinlərin yenidən qrunt sularından əziyyət çəkəcəyi proqnozlaşdırılır.
Onu da qeyd edək ki, son üç gün ərzində, havaların birdən birə istiləşməsi nəticəsində qrunt suları basmış həyətlərdə sanitar vəziyyət daha da pisləşib. Salyan rayon Gigiyena epidemioloji mərkəzin baş həkimi Mirəddin Ağayevin bildirdiyinə görə, dərmanlar toz halında olduğu üçün qrunt suları tamamilə çəkildikdən sonra həmin həyətlərdə dezinfeksiya işləri aparmaq mümkündür və aparılacaq.
