42 saylı Sumqayıt II seçki dairəsinin 1 və 6 saylı məntəqlərində müşahidəçilər qanun pozuntusuna yol veriblər
Milli Məclisə mayın 13-də 42 saylı Sumqayıt II seçki dairəsində keçirilən təkrar seçkilərdə hələlik iki qanun pozuntusu aşkarlanıb. Bu barədə Trend ə sözügedən seçki dairəsinin sədri Seyidrza Seyidov bildirib.
S.Seyidov qeyd edib ki, 1 və 6 saylı məntəqələrdə seçkiləri izləyən müşahidəçilər mövcud qanunlara riayət etmədiklərinə və səlahiyyətlərini aşdıqlarına görə məntəqə sədrləri tərəfindən bununla bağlı akt tərtib olunub. Seçki dairəsinin sədri qanunun tələblərini pozan müşahidəçilər arasında müxalifətin nümayəndələrinin çoxluq təşkil etdiyini də vurğulayıb.
Ümumiyyətlə isə sözügedən seçki dairəsində seçkilərin normal və şəffaf keçirildiyi bildirilib.
44 saylı Sumqayıt-Abşeron seçki dairəsinin sədri Vaqif Məmmədov isə bildirib ki, bu dairədə seçkiləri 775 yerli müşahidəçi izləyir. Bütün məntəqələrdə beynəlxalq müşahidəçilərin və Mərkəzi Seçki Komissiyasının nümayəndələrinin olduğunu deyən V.Məmmədov seçkilərin tam demokratik şəkildə keçdiyini söyləyib. Hətta onu da bildirib ki, səhər saatlarında seçicilərin fəallığı bir qədər gərginlik yaradıb.
