Naxçıvan Dövlət Universitetinin rektoru, akademik İsa Həbibbəyli Birləşmiş Millətlər Təşkilatı yanında fəaliyyət göstərən Beynəlxalq İnformasiyalaşdırma Akademiyasının həqiqi üzvü seçilib. Akademik İ.Həbibbəyli bu yüksək elmi ada informasiya cəmiyyətinin formalaşdırılması və humanitar informatika sahəsindəki səmərəli xidmətinə, habelə universitetlərarası əlaqələrdə yeni texnologiyaların tətbiqi üzrə əldə etdiyi mühüm nailiyyətlərə görə layiq görülüb.
Naxçıvan Dövlət Universitetində Azərbaycanın ali məktəbləri, eləcə də Avropa ölkələri və Türkiyə universitetləri ilə birgə həyata keçirilən "Elektron Naxçıvan" proqramı geniş əks-səda doğurub. Azərbaycan Milli Elmlər akademiyasının həqiqi üzvü olan İsa Həbibbəyli İnformasiyalaşdırma Akademiyasının akademiki olmaqla yanaşı, eyni zamanda Nyu-York Elmlər Akademiyasının da həqiqi üzvü, Türkiyə Cümhuriyyəti Atatürk Kültür Dil və Tarix Yüksək Qurumunun da müxbir üzvüdür.
