"Azadlıq" blokunun həmtəsisçisi: "Müxalifətin vahid namizədinin müəyyənləşdirilməsi ilə bağlı aparılan müzakirələr keçmiş səhvləri təkrarlamaq deməkdir"
Azərbaycan, Bakı / Trend müxbir İ.Əlizadə/ Müxalifətin vahid namizədinin müəyyənləşdirilməsi praktik cəhətdən mümkün deyil və bununla bağlı aparılan müzakirələr keçmiş səhvləri təkrarlamaq deməkdir. Bu barədə cümə günü Bakıda Vətəndaş və İnkişaf Partiyasının (VİP) sədri, "Azadlıq" blokunun həmtəsisçisi Əli Əliyev bildirib.
Əliyev qeyd edib ki, ideal seçki öncəsi şərait yarandığı təqdirdə vahid namizəd məsələsi nəzəri cəhətdən həyata keçirilə bilər. Onun fikrincə, nəzəri cəhətdən müxalifətin vahid namizəd müəyyənləşdirməsi imkanları var. Lakin praktik cəhtdən bunun həyata keçirilməsi mümkün deyil.
"Eyni zamanda 1998 və 2003-cü ilin prezident seçkiləri dövründə müxalifətin vahid namizədinin müəyyənləşdirilməsi məsələsi ideloji platforma kimi sınaqdan keçirilib. Bunun hansı nəticələr verdiyi məlumdur. Bu gün müxalifət qarşısında vahid namizədinin müəyyənləşdirilməsi kimi praktik cəhətdən həll edilməsi mümkün olmayan məsələnin qoyulması və bunun vəziyyətdən yeganə çıxış yolu kimi göstərilməsi keçmiş səhvlərin təkrarlanması istiqamətində fəaliyyətə rəvac verə bilər" - deyə "Azadlıq" blokunun həmtəsisçisi əlavə edib.
Onun sözlərinə görə, "Azadlıq" bloku müxalifətin vahid namizədinin müəyyənləşdirilməsi ilə bağlı aparılan müzakirələrdə iştirak etmək niyyətində deyil. "Azadlıq" bloku hesab edir ki, yaxın müttəfiqlərin birgə seçkidə iştirak etməsi daha yaxşıdır. Blok müxalifətin qüvvəsinin iqtidara qarşı yönəldilməsini vacib hesab edir: "Eyni zamanda müxalifət partiyaları arasında gələcəkdə birgə aksiyaların keçirilməsi və digər məsələlərdə əməkdaşlıq ola bilər".
Qeyd edək ki, "Azadlıq" blokunda 3 müxalifət partiyası - Azərbaycan Xalq Cəbhəsi (AXCP), Liberal və Vətəndaş və İnkişaf (VİP) partiyaları təmsil olunur.
