Azərbaycan, Bakı, 30 yanvar / Trend , müxbir P.Əliyeva/ "Quş qripi" xəstəliyinin yayılmasının qarşısının alınması üçün çöl quşlarının ovuna qadağan qoyulmasına baxmayaraq, Azərbaycanın cənub bölgəsində çöl quşlarınnın ovlanması davam edir. Trend in bölgə müxbirinin məlumatına görə, bu gün Ekologiya və Təbii Sərvətlər Nazirliyinin 1 saylı ərazi üzrə Ekologiya və Təbii Sərvətlər Şöbəsi, Lənkəran rayon Polis şöbəsi və Dövlət Baytarlıq Xidmətinin rayon baytarlıq idarəsinin bigə keçirdikləri reyd zamanı Lənkəranın Qumbaşı kəndi ərazisində əlindəki zənbili yerə qoyaraq qaçan şəxsin zənbilinə baxış keçirilərkən 44 ovlanmış çöl quşu aşkar edilərək götürülüb.
Azərbaycanda "quş qripi" xəstəliyinin qarşısını almaq məqsədilə 2005-ci ildən ETSN və Kənd Təsərüffatı Nazirliyi yanında Dövlət Baytarlıq Xidməti çöl quşlarının ovuna qadağa qoyub. Bu qadağa hələ ləğv edilməyib. Türkiyə, İran və Rusiyada "quş qripi" aşkarlandıqdan sonra bu ilin yanvarın ortalarından həmin ölkələrdən quş ətinin idxalına qadağa qoyulub.
Lənkəranda aşkarlanan çöl quşları bu gün yandırılaraq zərərsizləşdirilib. Biləsuvar rayonu ərazisində keçirilən reyd zamanı isə cöl quşlarını ovlamağa cəhd edən Cəlılabad sakini Xasıyev Səyyad, Biləsuvar sakinləri Əhmədov Kənan və Əhmədov Əlı saxlanılaraq onlardan 3 ədəd qanunsuz 16 kalibrli ov tüfəngi götürülüb. Barələrində protokol və akt tərtib edilərək müvafiq polis şöbələrinə göndərilib. Hər birini İnzibati Xətalar Məcəlləsinin müvafiq maddələri ilə 1100 manatdan 2200 manatadək cərimə gözləyir.
Cənub bölgəsində aparılan son monitorinqin nəticələrinə görə, bölgədə "quş qripi" aşkarlanmayıb.