"Azadlıq" qəzeti əməkdaşının vəkili müstəntiqi məhkəməyə verib

Azərbaycan, Bakı, 08 aprel / Trend , müxbir K.Zərbalıyeva/ "Azadlıq" qəzetinin bıçaqlanan jurnalistinin vəkili Baş Prokurorluğun müstəntiqini məhkəməyə verib.

Media Huquq İnstitutundan çərşənbə axşamı verilən məlumata görə, Aqil Xəlilin vəkili Elçin Sadıqov vəkil hüquqlarının, azadlıq və toxunulmazlıq, habelə ədalətli məhkəmə araşdırması hüquqlarının pozulduğunu iddia edir və Baş Prokurorluğun Ağır Cinayətlərə Dair İşlər üzrə İstintaq İdarəsinin müstəntiqi Əli Quliyevin cəzalandırılmasını və vəkilə dəyən ziyanın ödənilməsini tələb edir.

Vəkilin ərizəsi bakı şəhər Nəsimi rayon məhkəməsinə təqdim olunub.

"Azadlıq" qəzetinin iki dəfə basqına məruz qalmış əməkdaşı Xəlilin hüquqlarını müdafiə edən Sadıqov hüquqlarını müdafiə etdiyi şəxsin aprelin 4-də Baş Prokurorluğun Ağır Cinayətlərə Dair İşlər üzrə İstintaq İdarəsində dindirilərkən vəkil hüquqlarını gerçəkləşdirməyə imkan verilməməsindən, 12 saatdan artıq qapalı şəraitdə saxlanılmasından, müstəntiq Əli Quliyevin onun İstintaq İdarəsinin binasını tərk etməyə imkan verməməsindən narazı qalıb. Şikayət ərizəsində qeyd olunur ki, Sadıqov jurnalistin vəkili olaraq dindirmədə iştirak etmək üçün istintaq idarəsinə dəvət edilib. Vəkil bildirilən vaxtda - saat 14:30-da idarəyə gəlsə də, onu 2 saat gözlədiblər. Vəkil qanunvericiliyə görə, dindirmədə onun iştirakının məcburi olmadığını bildirərək getmək istəsə də, müstəntiq Quliyev onun buraxılış vəsiqəsinə imza atmayıb, bunu əsas gətirən nəzarətçilər isə Sadıqovun binanı tərk etməsinə icazə verməyiblər. Saat 17:30-da yenidən dindirmə prosesinə qatılan Sadıqova, şahidlərə və jurnalistin döyülməsində şübhəli qismində dəvət olunan şəxsə suallar verməyə imkan yaradılmayıb. Dindirmə prosesi bütünlüklə videoçəkilişə alınsa da, vəkilin sual vermək üçün israr edərkən çəkiliş dayandırılıb. Dindirmə prosesi gecə 2:00-dək davam edib. Prokurorluqda olduğu 12 saat ərzində vəkilə harda olması barədə yaxınlarına məlumat verməyə də şərait yaradılmayıb.

12 saat prokurorluqda saxlanılmasını qanunsuz, əsassız və həbsə bərabər hesab edən Sadıqov iddia edir ki, müstəntiq ona münasibətdə Konstitusiyanın, Cinayət-Prossesual Məcəllənin, İnsan hüquqlarının və əsas azadlıqların müdafiəsi haqqında Avropa Konvensiyasının 5-ci (azadlıq və şəxsi toxunulmazlıq hüququ) və 6-cı (ədalətli məhkəmə araşdırması hüququ) maddələrinin ciddi pozuntusuna yol verib.

Sadıqov məhkəmədən müstəntiq Quliyev barəsində xüsusi qərar qəbul edilməsini tələb edib.

Məqalənin  müəllifi ilə [email protected] ünvanı  ilə əlaqə saxlaya bilərsiniz