Azərbaycan, Bakı, 22 aprel / Trend , müxbir C.Babayeva/ Gürcüstanda yaşayan azərbaycanlılar Dünya Azərbaycanlıları Konqresinin (DAK) parçalanmaması üçün təşkilatın bütün üzvlərini iyunun 20-22-də Brüsseldə keçiriləcək X növbədənkənar (Birlik) Qurultayda iştiraka çağırırlar. Müraciət DAK-ın Borçalı üzrə nümayəndəsi, Borçalıda fəaliyyət göstərən "Ozan" birliyinin sədri Kamil Musayevin başçılığı altında Birliyin İdarə Heyətinin keçirilən iclasında qəbul olunub.
"DAK-ın daxilində parçalanmanın olması Azərbaycan xalqının birliyinin qarşısını alır, elə ona görə də DAK-la bağlı fəaliyyət göstərən bütün qurumlar iyun ayında keçiriləcək Birlik qurultayınadək fəaliyyət göstərməli və qurultayda DAK-ın sədri kim seçilərsə, soydaşlarımız onun ətrafında birləşməlidir", deyə müraciətdə bildirilib.
İclas iştirakçıları DAK-ın IX qurultayında sədr seçilmiş prof. Qulamrza Səbri Təbrizinin başçılığı ilə iyunun 20-22-də Belçikanın paytaxtı Brüsseldə keçiriləcək X Birlik Qurultayını yekdilliklə dəstəkləyib. Müraciəti Gürcüstanda yaşayan 40-dan artıq azərbaycanlı imzalayıb.
DAK daxilində yaranmış narazılıqlar nəticəsində İdarə Heyəti (İH) iki yerə bölünüb. İH-nin 16 nəfər üzvündən 11-i Sabir Rüstəmxanlını DAK-ın sədri seçib və mayın 24-25-də Almaniyanın Köln şəhərində növbədənkənar qurultay keçirməyə hazırlaşırlar. İH-nin qalan üzvləri və tərəfdarları Qulamrza Səbri Təbrizinin sədrliyini dəstəkləyir və iyunun 20-22-də qurultay keçirəcəklər.
