Azərbaycan, Bakı, 22 may / Trend , müxbir R.Ergün/ Azərbaycanın "Xəzər-Lənkəran" futbol klubu ölkə kubokunu qazansalar, dfutbolçulara çox yüksək məbləğdə pul mükafatı verəcək. "Hələ ki, kuboku qazanacaqları halda futbolçularımızın alacağı pul mükafatının məbləği açıqlanmayıb. Bu məsələ klub prezidentinin səlahiyyəti çərçivəsindədir. Amma bunu deyə bilərəm ki, Azərbaycanda heç bir klub futbolçularına çempionluğu və kuboku qazandıqlarına görə bizim qədər çox pul vermir", - cümə axşamı Trend -a "Xəzər-Lənkəran" klubunun vitse-prezidenti Tuyqun Nadirov deyib.
Mayın 24-də keçiriləcək Azərbaycan kubokunun final oyununda "Xəzər-Lənkəran" "İnter" klubu ilə görüşəcək. Oyun Tofiq Bəhramov adına Respublika stadionunda keçiriləcək.
Vitse-prezident bildirib ki, final oyunu üçün "Xəzər-Lənkəran" klubu AFFA-dan beş minə yaxın bilet alıb. "Final oyununda klubumuzun azarkeşlərinin sayının nə qədər olacağını dəqiq deyə bilmərəm. Beş min biletdən əlavə, fanklubumuzun rəsmi üzvü olan fanatlar üçün də biletlər təşkil edəcəyik. Stadionun 16 və 17-ci sektorları bizim üçün ayrılacaq" - deyə Nadirov əlavə edib.
"Xəzər-Lənkəran" futbol üzrə Azərbaycan çempionatının və kubokunun son qalibidir.
Komandanın baş məşqçisi Ağasəlim Mircavadovdur.
Məqalə müəllifi ilə əlaqə ünvanı: [email protected]