Azərbaycan, Bakı, 23 may / Trend , müxbir K.Zərbalıyeva/ Azadlıq Hərəkatçıları Birliyi "Azadlıq" qəzetini məhkəməyə verib.
Birlik qəzetin Azərbaycan Xalq Cəbhəsinin (AXC) təsisçiliyindən çıxarılaraq kollektivin təsisçiliyinə verilməsinin qeyri-qanuni hesab olunması, "Azadlıq" qəzetinin indiki rəhbərlik və kollektivlə istehsalına və yayımına xitam verilməsini tələb edir.
İddia üzrə hazırlıq iclası iyunun 5-də Bakının Yasamal rayon məhkəməsində keçiriləcək.
İddiada qeyd olunur ki, "Azadlıq" qəzeti AXCP-nin orqanı kimi deyil, qəzetin kollektivinin orqanı kimi fəaliyyət göstərir.
İddia ərizəsində deyilir ki, "heç kim haqq verə bilməz ki, azadlıq hərəkatı fəallarının yaratdığı "Azadlıq" qəzeti Qənimət Zahid, Mirzə Sakit, Aqil Xəlil kimi şər-böhtan bahadırlarının, Ruslan Bəşirli, Eynulla Fətullayev kimi düşmənlə separatçılıq edənlərin tribunasına çevirilsin".
İddiaçı "Azadlıq" qəzetinin indiki rəhbərindən AXC qurucuları və həmin qəzetin təsisçilərinə vurduğu mənəvi zərərə görə mətbuat vasitəsilə üzr istənilməsini, AXC qurucularına, cəmiyyətə vurulan mənəvi zərərə görə isə 150 min manat məbləğində kompensasiyanın ödənilməsini tələb edir.
"Azadlıq" qəzetinin direktoru Azər Əhmədov iddianı siyasi hakimiyyətdən gələn sifariş kimi qiymətləndirib və hesab edir ki, bu, qəzetə qarşı başlamış "Səlib yürüşü"nün tərkib hissəsidir.
"Azadlıq" qəzetinin iki əməkdaşı məhkəmənin hökmü ilə məhkum olunub, digər əməkdaşı Xəlilin həyatına isə iki dəfə sui-qəsd edilib.
"Azadlıq" qəzeti 1989-cu ildə Azərbaycan Xalq Cəbhəsinin orqanı kimi yaradılıb. 1993-cü ildə redaksiya kollektivi də təsisçi olub. Xalq Cəbhəsi partiyaya çevriləndən bir neçə il sonra qurum qəzetin təsisçiliyindən imtina edib. Bundan sonra qəzetə redaksiya kollektivi təsisçilik edib.
Azadlıq Hərəkatçıları Birliyi 2006-cı ilin yanvarında təsis edilib.
Müəlliflə əlaqə saxlamaq üçün elektron ünvan - [email protected]