Azərbaycan, Bakı, 12 iyun / Trend , müxbir K.Zərbalıyeva/ Azərbaycanın sabiq səhiyyə naziri məhkəmə tərkibinə etiraz verib. Bu gün Bakı Apellyasiya Məhkəməsində sabiq nazir Əli İnsanovun Azərbaycan Dövlət Televiziyasına (AzTV) qarşı şərəf və ləyaqətin alçaldılması iddiası ilə məhkəmə qərarından verilmiş şiakyət üzrə proses keçirilib.
Sabiq səhiyyə naziri Əli İnsanov ötən il müxtəlif iqtisadi cinayətlərdə təqsirli bilinərək 11 il müddətinə azadlıqdan məhrum edilib.
Sabiq nazirin vəkili Toğrul Babayev Trend -a bildirib ki, prosesdə İnsanovun və onunla bağlı AzTV-də efirə gedən reportajı hazırlamış jurnalistin iştirakı barədə vəsatətlər verilsə də, hakim Tatyana Qoldman vəsatətləri təmin etməyib.
İnsanovun vəkili məhkəmənin qərəzli olduğunu əsas gətirərək məhkəmə tərkibinə etiraz verib.
Bu səbəbdən də proses qeyri-müəyyən müddətə təxirə salınıb.
Sabiq nazir AzTV-də nümayiş olunan filmdə onun evindən qızıl külçələr və digər qiymətli əşyaların tapılması barədə süjetdə ona böhtan atıldığını, həmçinin həmin zinət əşyalarının ona məxsus olmadığını bildirir.
İnsanov iyunun 18-də Səbail rayon məhkəməsində hakim Yeni Azərbaycan Partiyasının (YAP) sədr müavini və icra katibi Əli Əhmədova qarşı iddiası üzrə keçiriləcək prosesdə də iştirak etmək istəyir.
Bu barədə vəsatəti sabiq nazir cəza çəkdiyi müəssisənin rəhbərliyinə təqdim edib.
Sabiq nazir məhkəmə hökmü olmadan Əhmədovun mətbuata açıqlamalarında onu cinayətkar adlandırmasına etiraz edib. Sabiq nazir bir il öncə Səbail rayon məhkəməsinə müraciətində Əhmədovun təkzib verməsini və onun barəsində xüsusi ittiham qaydasında cianyət işi açılmasını tələb edir.
Müəlliflə əlaqə saxlamaq üçün elektron ünvan - [email protected]