Azərbaycan, Bakı, 23 iyun / Trend , müxbir K.Zərbəliyeva/ Strasburqda səfərdə olan Azərbaycanın hüquq müdafiəçiləri Avropa Şurası Parlament Assambleyasındakı görüşlərdə Cənubi Qafqaz üzrə xüsusi məruzəçinin təyini məsələsini qaldırıblar. Bu barədə bazar ertəsi Strasburqdan telefonla məlumat verən Söz Azadlığı Müdafiə Komitəsinin sədri Arzu Abdullayeva bildirib ki, Azərbaycan üzrə həmməruzəçi Andres Herkellə görüşdə həmməruzəçi həbsdə olan jurnalistlərin, eləcə də Repartyorların Azadlığı və Təhlükəsizliyi İnstitutunun rəhbəri Emin Hüseynlinin vəziyyəti ilə maraqlanıb. Herkel iyunun 24-də Azərbaycanla bağlı məruzə edərkən bu məsələyə xüsusi diqqət ayıracağını vurğulayıb.
Trend -un arayışı: Emin Hüseynli iyunun 14-də "Alaturka" kafesindən Çe Gevaranın 80 illiyini qeyd edən bir qrup gənclə bərabər Nəsimi rayon Polis İarəsinin 22-ci bölməsinə aparılıb. Hüseynli iddia edir ki, onu bölmədə döyüblər, Daxili İşlər Nazirliyi isə bunu təkzib edir.
Azərbaycanın AŞ PA-dakı nümayəndə heyətinin rəhbəri Səməd Seyidov Trend -a xüsusi məruzəçinin təyin olunmasına ehtiyac olmadığını bəyan edib.
Azərbaycanda 3 jurnalist məhkum olunub və həbsdədir.
Məqalə müəllifi ilə əlaqə ünvanı: [email protected]