Azərbaycan, Bakı, 31 oktyabr / Trend , müxbir K.Zərbalıyeva/ Məhkəmə Bakıda 25 nəfərin ölümü ilə nəticələnmiş bina uçqununda təqsirli bilinənlərin barələrindəki hökmü qüvvədə saxlayıb.
Cümə günü Bakı Apellyasiya Məhkəməsində ötən il Bakıda 25 nəfərin ölümü ilə nəticələnmiş bina uçqununda təqsirli bilinənlərin barələrindəki hökmdən verilən apellyasiya şikayətinə baxılıb.
Məhkəmə apellyasiya şikayətini təmin etməyib və Ağır Cinayətlərə Dair İşlər üzrə Məhkəmənin hökmünü qüvvədə saxlayıb.
Ötən il avqustun 28-də Yasamal rayonu, Murtuza Muxtarov küçəsi, 185 saylı ünvanda "Mütəfəkkir" Məhdud Məsuliyyətli Cəmiyyəti tərəfindən inşa edilən on beş mərtəbəli yaşayış binası tamamilə uçub. Nəticədə 25 nəfər həlak olub, 6 nəfər xəsarət alıb.
"Mütəfəkkir" MMC-nin baş direktoru, mühəndis Əsgər Əliyev 9, iş icraçıları Fərhad Həsənov 7, Qədir Səlimov 5 il 6 ay, Mürsəl Haqverdiyev 5, Eldar Rəhimov 4 il 6 ay müddətinə azadlıqdan məhrum ediliblər.
Bakı şəhər İcra Hakimiyyətinin Mənzil Tikinti İdarəsinin sabiq rəisi Akif Məhərrəmovun həbsdə saxlandığı 8 ay müddət cəzaya hesablanmaqla məhkəmə zalından azad olunub.
Faktla bağlı Bakı şəhər Prokurorluğunda Cinayət Məcəlləsinin ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan tikinti işlərinin aparılmasının təhlükəsizlik qaydalarını pozma, qanunvericiliklə müəyyən olunmuş qaydada müvafiq icra hakimiyyəti orqanlarının razılığını almadan özbaşına bina tikmə (222.2 və 222-1.2) maddələri ilə cinayət işi başlanıb.
"Mütəfəkkir" MMC-nin rəhbəri Əli Muradov ötən il ürək xəstəliyindən isintaq təcridxanasında dünyasını dəyişdiyindən cinayət işinin ona aid hissəsinə xitam verilib.
Müəlliflə əlaqə saxlamaq üçün elektron ünvan- [email protected]
