Azərbaycan, Bakı, 13 avqust / Trend , muxbir H.Bağırov /
Litvada uzunluğa tullanma üzrə dünya çempionu narkotiklərin qanunsuz satışı və qaçaqmalçılıq cinayətlərinə görə Azərbaycanda məhkəməyə cəlb edilib.
Ağır Cinayətlərə Dair İşlər üzrə Məhkəmədən cümə axşamı Trend -a verilən məlumata görə, Litva vətəndaşı Turskis Tomas və Pakistan vətəndaşı Zahoor Xan Əhməd oğlunun bu gün keçirilən məhkəməsində təqsirləndirilənlər ifadə veriblər.
Adıçəkilən şəxslər şəxsiyyətləri istintaqla müəyyən edilməmiş İxrac, Arturas və Kristis adlı digər şəxslərlə mütəşəkkil dəstə yaradaraq respublikanın gömrük sərhədindən qaçaqmalçılıq yolu ilə satış üçün qanunsuz olaraq külli miqdarda narkotik vasitəni Azərbaycana keçirməkdə günahlandırılırlar.
Zahoor Xan Əhməd oğlu may ayının ortalarında qanunsuz olaraq ümumi çəkisi 6 kq 952 qram heroini İxrac adlı şəxsdən qəbul edib və onun tapşırığı ilə mütəşəkkil dəstənin digər üzvü Turskis Tomasa çatdırmalıymış.
Zahoor Xan Əhməd oğlu heroini Pakistandan İrana gətirib, oradan isə Astara Gömrük İdarəsinin ərazisindən, Azərbaycanın gömrük sərhədindən gömrük nəzarətindən gizli keçirərkən yaxalanıb.
Turskis Tomas ifadəsində bildirib ki, Bakıya istirahət üçün gəlib. Oteldə olarkən Arturas ona zəng edərək göndərdiyi çemodanın oteldə 209-cu otaqda qalan pakistanlıya çatdırmağını xahiş edib və ona bunun müqabilində 5000 avro veriləcəyi vəd edilib. Tomas bildirib ki, çemodanın içərisində narkotik olmasından xəbəri olmayıb. O, çemodanı həmin şəxsə çatdırarkən saxlanılıb.
Zahoor Xan Əhməd oğlu isə bez ticarəti ilə məşğul olduğunu bildirib. Onun sözlərinə görə, Azərbaycana keçirdiyi çemodanda narkotik yerləşdirlməsindən yalnız həbs olunandan sonra xəbər tutub.
Proses davam edir.
Zahoor Xan Əhməd oğlu və Turskis Tomas Dövlət Gömrük Komitəsinin əməkdaşları tərəfindən bu ilin mayın 25-də saxlanılıblar
Məqalə müəllifi ilə əlaqə unvanı: [email protected]
...