Azərbaycan, Bakı, 29 sentyabr / Trend , muxbir H.Bağırov /
Azərbaycanın Siyəzən rayonunda polis əməkdaşını qətlə yetirməkdə ittiham olunan Kəlbəcər rayon sakininin məhkəməsi başlayıb.
Trend -un məlumatına görə, çərşənbə axşamı Ağır Cinayətlərə Dair İşlər üzrə Məhkəmədə keçirilən hazırlıq iclasında zərərçəkmişin nümayəndəsi təqsirləndirilən Rasim Məmmədovun əməlinin Cinayət Məcəlləsinin 120.2.3-cü maddəsi ilə (zərərçəkmiş şəxsin xidməti vəzifəsini və ya ictimai borcunu yerinə yetirilməsi ilə əlaqədar öldürmə) tövsif olunması üçün istintaqa qaytarılması barədə vəsatət verib.
Hakim vəsatətin məhkəmə istintaqı zamanı müzakirə ediləcəyini və ona qiymət veriləcəyini bildirib.
28 yaşlı Rasim Adil oğlu Məmmədov bu ilin iyunun 1-də Bakı-Quba yolunun 90-cı km-də, Siyəzən rayonu ərazisindəki Xıdır Zində Pirinin yaxınlığında Daxili İşlər Nazirliyinin Baş Dövlət Yol Polis İdarəsinin əməkdaşı, polis baş serjantı, Xırdalan qəsəbəsi sakini Elçin İsmayılovu mübahisə zəminində döyərək, qətlə yetirib.
Bakının Zabrat I qəsəbəsində müvəqqəti yaşayan Məmmədov idarə etdiyi "Opel Vectra" markalı maşınla Bakı-Quba yolunda yüksək sürətlə hərəkət etdiyi üçün yol polisi tərəfindən saxlanılıb. Bu zaman onun yanında qeyri-qanuni birlikdə yaşadığı qadın və uşağı olub. Yol polisi ilə razılıq əldə ediləndən sonra o, yoluna davam edib. Bu zaman növbəsi bitdiyi üçün Elçin Ismayılolov da onunla birgə Bakıya gəlmək üçün maşına əyləşib. Lakin Siyəzən rayonu ərazisində Xıdır Zində pirinin yaxınlığında sürücü ilə polis əməkdaşı arasında mübahisə baş verib. Nəticədə Məmmədov İsmayılova çoxsaylı zərbələr endirərək onu qətlə yetirib.
İbtidai istintaqla Məmmədov xuliqanlıq niyyəti ilə adam öldürmə (120.2.), xüsusi amansızlıqla adam öldürmə (120.2.4) və xuliqanlıq (221) maddələri ilə ittiham olunub.
Məqalə müəllifi ilə əlaqə ünvanı: [email protected]