Azərbaycan, Bakı, 29 sentyabr / Trend , muxbir K.Zərbalıyeva/
Bakıda yerləşən "Fatmeyi Zəhra" məscidinin sökülməsinə etiraz olaraq Yeni Günəşli qəsəbəsinin əhalisi imza toplamağa başlayıb.
"Fatmeyi Zəhra" dini icmasının rəhbəri Tofiq Rəsizadə çərşənbə axşamı Trend -a bildirib ki, qəsəbə sakinləri bu ərazidə məscid olmadığını əsas gətirərək məsçidin sökülməsi ilə bağlı məhkəmə qərarının ləğv olunmasını tələb edirlər.
İcma sədri qeyd edib ki, Müharibə Veteranları İctimai Birliyi də məscidin fəaliyyətinə icazə verilməsinə kömək göstərməsi xahişi ilə hökumət dairələrinə məktubla müraciət ediblər.
Trend -un arayışı: Suraxanı rayon İcra hakimiyyəti Yeni Günəşli qəsəbəsi V massivi 33 ünvanında yerləşən "Fatmeyi Zəhra" məsçidinin inşa olunduğu torpaq sahəsinin Bakı Şəhər İcra Hakimiyyətinin başçısının sərəncamı ilə onlara verildiyini və məsçidin qanunsuz tikildiyini əsas gətirərək məscidin və ərazidəki yardımçı tikililərin sökülməsi tələbi ilə məhkəməyə müraciət edib.
2 saylı Yerli İqtisad Məhkəməsi "Fatmeyi Zəhra" məscidinin sökülməsinə qərar verib. Məhkəmə məscidin yerləşdiyi torpaq sahəsinin iddiaçıya verilməsi, məscidin sökülməsi və dini icmanın həmin ərazidən çıxarılması barədə qətnamə qəbul edib.
Bakı Şəhər İcra Hakimiyyəti başçısının 1996-cı il tarixli sərəncamı ilə Yeni Günəşli qəsəbəsində "Fatmeyi Zəhra" məscidinin tikintisi üçün 1 ha 30 sot torpaq sahəsi ayrılıb.
Tikintinin aparılması üçün müvafiq sənədlər isə Bakı Şəhər İcra Hakimiyyəti tərəfindən hazırlanıb.
Lakin Bakı Şəhər İcra Hakimiyyəti başçısı Hacıbala Abutalıbov 2002-ci ilin sonunda həmin torpaq sahəsinin uzun müddət istifadə olunmadığına görə, sərəncamın ləğv olunması və torpaq sahəsinin Suraxanı rayon İcra Hakimiyyətinə idman və əyləncə kompleksinin tikintisi üçün ayrılması barədə sərəncam verib.
Son bir ildə Bakıda qanunsuz tikildiyi əsas gətirilərək Məhəmməd Peyğəmbər Məscidi, Neft Daşlarındakı məsçid sökülüb, "Şəhidlər" Məscidi isə təmirə dayanıb.
Məqalə müəllifi ilə əlaqə ünvanı: [email protected]