Azərbaycan, Bakı, 2 aprel /Trend/
Sumqayıtda yaşıllıqlara verilən suvarma işlərinin keyfiyyətinin artırılması məqsədilə 640 p/metr yeni su xətti çəkilib.
"Ekologiya ili" çərçivəsində Sumqayıtda mövcud olan bütün küçə, park və alleyalardakı yaşıllıq sahələrinə mütəmadi olaraq aqrotexniki qulluq göstərilməklə yanaşı, eyni zamanda cari ilin mart ayı ərzində şəhərin bir çox ərazilərində yeni ağaclar əkilib, abadlıq-bərpa işləri aparılıb.
Sumqayıt Şəhər İxtisaslaşdırılmış Yaşıllaşdırma Tikinti İdarəsindən verilən məlumata əsasən, ötən ay ərzində şəhərin Azərbaycan və H.Əliyev prospektlərində, Koroğlu, Sülh və Bakı küçələrində, "Tərəqqi" parkında ümumilikdə 4600 ədəd ağac, 1500 ədəd mövsümi gül, dekorativ kol əkilib. Hazırda Sumqayıtda adambaşına düşən yaşıllıq sahəsi 26,5 kv.metr təşkil edir ki, bu da respublika şəhərlərinin orta göstəricisindən yüksəkdir. Lakin buna baxmayaraq, bu göstəricinin 2 dəfə artırılaraq 50 kv.metrə çatdırılması nəzərdə tutulub.
