Azərbaycan, Bakı, 18 oktyabr /Trend, müxbir S.Süleymanov/
Məşhur qazax şairi, Qazaxıstanın YUNESKO-dakı nümayəndəsi Oljas Süleymenov başqa xalqlara nifrətlə əlaqədar olaraq bütün dünyada ən yeni tarix dərsliklərinin məzmununa yenidən baxmağı təklif edib.
"Mən istərdim ki, YUNESKO bütün ölkələrin hökumətlərini məktəblərdə humanitar elmlərə, xüsusən də ən yeni tarix dərsliklərinə xüsusi diqqət yetirməyə məcbur edəcək hansısa beynəlxalq aktın və ya beynəlxalq qanunun təşəbbüskarı olsun", - Süleymenov bazar ertəsi Astanada keçirilən dini mədəniyyət forumunda çıxışı zamanı deyib.
Şair indiki nəslin məktəbi bitirdikdən sonra kamal attestatı ilə yanaşı, təəssüf ki, nifrət hissi də almasını qeyd edib.
"O, [gənc insan] kamal attestatı ilə birlikdə siyasi biliklər də alır və təəssüf ki, kimi sevmək, kimə isə hədsiz nifət bəsləmək biliyini də alır", - Süleymenov qeyd edib.
Onun fikrincə, belə yanaşma yaşlı nəslin gənc nəslin düşüncəsinə "geç işə düşən minanı basdırmasına" gətirib çıxarır.
"Özünüdərkin formalaşdığı məktəb oturacağından gənc insan dünyaya beynində müharibə fikri ilə çıxır. Və dünya ictimaiyyətinin ölkə hökumətlərinə belə vəziyyətdə təsir etmək üçün vasitəsi olmalıdır", - Süleymenov vurğulayıb.
Şair nitqinin sonunda təklif irəli sürüb ki, Astanada Ümumdünya Dini Mədəniyyət Forumu çərçivəsində YUNESKO-ya müraciət olunacaq bəyannamə hazırlansın.
