Azərbaycan, Bakı, 29 noyabr /Trend, müxbir M.Əliyev/
Azərbaycanın Ekologiya və Təbii Sərvətlər Nazirliyi yeni nəşr olunacaq "Qırmızı Kitab"a salınması zəruri olan fauna və flora növləri üzrə təkliflər gözləyir. Bunu Trend-ə ekologiya və təbii sərvətlər naziri Hüseynqulu Bağırov bildirib.
Nazirin sözlərinə görə, bu ilin dekabr ayının ortalarına qədər bu sahədə çalışan alimlərin, elmi işçilərin, qeyri-hökümət təşkilatlarının təklifləri qəbul olunaraq araşdırılacaq.
"Qırmızı Kitab"ın birinci nəşrində olan bir sıra heyvan növlərinin hazırda nəsli kəsilmə təhlükəsindən uzaq olmasına baxmayaraq, bu növlərin ikinci nəşrə əlavə edilməsi və insanların şüurunda psixoloji sədd məqsədi ilə kitabda saxlanılması təklif olunur.
Bağırov bildirib ki, "Qırmızı Kitab"ın ikinci nəşrinin fevral ayında çap olunması gözlənilir.
Azərbaycanın "Qırmızı Kitab"ının birinci nəşrinə məməlilərdən 14 növ, quşlardan 36, balıqlardan 5, amfibi və reptililərdən 13 növ və yarım növ, həşəratlardan 40, bitkilərdən 140 növ daxil edilib.
Azərbaycanın "Qırmızı Kitab"ının ikinci nəşrinin Azərbaycan və ingilis dillərində dərc edilməsi nəzərdə tutulur.
"Qırmızı Kitab"ın ikinci nəşrində yer alacaq materiallardan ibarət muzey də yaradacaq. Muzeyin yaradılması növbəti nəşrlər zamanı görüləcək işlərin daha asan təşkil edilməsi və səmərəliliyinə xidmət etmək məqsədi ilə həyata keçiriləcək.
Noyabr ayında Azərbaycanın "Qırmızı Kitabı"nın veb səhifəsi - /www.redbook.az/ yaradılıb.