Azərbaycan, Bakı, 12 may /Trend, müxbir K.Zərbalıyeva/
Ədliyyə orqanlarına işə qəbulla bağlı mayın 21-də test imtahanı keçiriləcək.
Ədliyyə Nazirliyinin mətbuat xidmətindən Trend-ə verilən məlumata görə, Tələbə Qəbulu üzrə Dövlət Komissiyası ilə birgə keçiriləcək müsabiqə üzrə test imtahanı şəffaflığın artırılması məqsədilə bütün namizədlər üçün vahid auditoriyada - Azərbaycan Texniki Universitetinin idman sarayında keçiriləcək.
Namizədlərdən imtahanın başlanmasına azı bir saat qalmış qeyd olunan ünvana gəlmələri xahiş olunur.
Namizədlər "İmtahana buraxılış vərəqəsi"ni mayın 19-dan etibarən şəxsiyyət vəsiqəsini təqdim etməklə səhər saat 09:00-dan axşam saat 18:00-dək Azərbaycan Respublikası Ədliyyə Nazirliyinin inzibati binasında götürməlidirlər.
İmtahana gələrkən namizədlər "İmtahana buraxılış vərəqəsi"ni və şəxsiyyət vəsiqəsini mütləq gətirməlidirlər. Göstərilən sənədlərdən biri təqdim edilmədikdə namizəd imtahana buraxılmayacaq.