Azərbaycan, Bakı, 25 may /Trend, müxbir İ.İsabalayeva/
Azərbaycan Milli Elmlər Akademiyası Arxeologiya və Etnoqrafiya İnstitutu Xəzər dənizində sualtı arxeoloji qazıntı işlərinin aparılması üçün tələb olunan avadanlıqların alınması məqsədilə müvafiq qurumlara müraciət edəcək.
Trend-in məlumatına görə, institutun direktoru Maisə Rəhimova çərşənbə günü jurnalistlərə bildirib ki, Xəzər dənizində qazıntı işlərinin aparılması üçün lazımi texniki avadanlıqlar Azərbaycanda yoxdur.
Onun sözlərinə görə, bundan əlavə, Xəzər dənizində ekspedisiyaların aparılması üçün mütəxəssis də hazırlamaq lazımdır.
İnstitut direktoru əlavə edib ki, maddi-mənəvi abidələrin aşkarlanması baxımından Xəzər dənizində qazıntı işlərinin aparılması olduqca vacibdir.
"Xəzər dənizində arxeoloji qazıntı işlərinin bu il ərzində aparılması mümkün olmayacaq. Bu il yalnız kəşfiyyat xarakterli ekspedisiya ola bilər. Belə ekspedisiya ötən il də aparılmışdı", - Rəhimova bildirib.