Azərbaycanda orta təhsilin 10 illik hədəfləri açıqlanıb
Azərbaycan, Bakı, 14 sentyabr /Trend, müxbir İ.İsabalayeva/
Azərbaycanın təhsil naziri Misir Mərdanov ölkəmizin ümumi təhsil sisteminin növbəti 10 il üçün başlıca hədəflərini açıqlayıb.
Trend-in məlumatına görə, Mərdanov Təhsil Nazirliyinin rəsmi mətbuat orqanı olan "Azərbaycan müəllimi" qəzeti üçün yazdığı məqalədə bildirib ki, 10 il üçün hədəflər təhsil infrastrukturunun yenidən qurulması üzrə işləri davam etdirməklə bütün ümumtəhsil məktəblərinin beşgünlük tədris həftəsinə və birnövbəli iş rejiminə keçməsini təmin etməkdir.
Bununla yanaşı, hədəflərə təhsil müəssisələrinin maddi-texniki təminatına dair minimum tələbatı əks etdirən standartlar hazırlayıb təsdiqlətmək, xüsusi istedada malik uşaq və gənclər üçün təhsil müəssisələri şəbəkəsini genişləndirmək, müvafiq inkişaf mərkəzləri təşkil etmək aiddir.
Mərdanov bildirib ki, xüsusi qayğıya ehtiyacı olan, eləcə də sağlamlıq imkanları məhdud uşaqlar üçün regional bərpa-sağlamlıq mərkəzlərinin təsis edilməsi, inklüziv təhsilin tətbiqi imkanlarının genişləndirilməsi, 12 illik ümumi təhsilə keçidin təmin olunması və bununla əlaqədar təhsil proqramlarının (kurikulumların) yeniləşdirilməsi qarşıya qoyulan hədəflərdəndir.
Bu hədəflər həm də tam orta təhsil səviyyəsində təhsilin təmayüllər üzrə təşkili, bütün təhsil müəssisələrinin internetlə təmini, "Elektron məktəb"lərin sayının artırılması, təhsil fəaliyyətlərinin qiymətləndirilməsi və təhsilin keyfiyyətinə nəzarət üzrə təkmil monitorinq sisteminin yaradılması, ixtisaslarının artırılması mexanizmlərinin təkmilləşdirilməsi, adambaşına maliyyələşdirmə modellərinin geniş tətbiqi, ümumi təhsil müəssisələrinin mövcud şəbəkəsi ilə bağlı rasionallaşdırma tədbirlərinin həyata keçirilməsi və digər aktual məsələlərdir. Qeyd olunan istiqamətlər üzrə fəaliyyətlər, heç şübhəsiz, ayrıca alt-proqramlar, layihələr əsasında təşkil ediləcək.
