Azərbaycan, Bakı, 3 oktyabr /Trend, müxbir İlkin İzzət/
Henri Kissencerə Nizami Gəncəvi Beynəlxalq Mərkəzinin (NGBM) xüsusi Qızıl medalı təqdim olunub.
Diasporla İş üzrə Dövlət Komitəsinin mətbuat xidmətindən Trend-ə verilən məlumata görə, Amerika Birləşmiş Ştatlarının (ABŞ) dövlət xadimi, siyasətçi, beynəlxalq münasibətlər üzrə diplomat və ekspert H.Kissencerə Nizami Gəncəvi Beynəlxalq Mərkəzinin xüsusi Qızıl medalı təqdim olunub.
Mükafatı təşkilatın adından Mərkəzin baş katibi Rövşən Muradov təqdim edib. Nyu Yorkda keçirilən təqdimat zamanı H.Kissencerlə NGBM-nin fəaliyyəti, əsasən də Madrid Klubu ilə birgə Diasporla İş üzrə Dövlət Komitəsinin dəstəyi ilə 2015-ci ildə Bakıda keçiriləcək III Qlobal Müştərək Cəmiyyətlər Forumu müzakirə olunub.
Qeyd edək ki, H.Kissencer ABŞ-ın milli təhlükəsizlik məsələləri üzrə sabiq müşaviri, keçmiş dövlət katibi, Nobel sülh mükafatı laureatıdır. ABŞ-ın müasir xarici siyasətinin formalaşmasında mühüm rola malik H.Kissencer ABŞ-SSRİ münasibətlərinin yeni müstəviyə keçməsinin təşəbbüskarı və icraçısı, ölkəsinin Çin Xalq Respublikası ilə münasibətlərinin əsasını qoyan, Vyetnam müharibəsini bitirən Paris sülh müqaviləsini imzalayan siyasətçi kimi tarixə düşüb. H.Kissencer hazırda "Kissenger Associates" beynəlxalq konsaltinq firmasının rəhbəridir.