Bakı. Trend:
Müntəzəm surətdə avtomobil yollarının və yol qurğularının istismar vəziyyəti barədə məlumatların toplanması, respublikanın magistral avtomobil yollarında, dağlıq rayonlarda, həmçinin Bakı şəhərinin avtomobil yollarında, prospekt və küçələrində mövcud vəziyyət barədə məlumatların əldə edilməsi məqsədi ilə Nəqliyyat Nazirliyi "Azəryolservis" ASC-də (012) 599-79-75 nömrəli xüsusi telefon xətti, "Qaynar xətt" fəaliyyət göstərir.
"Azəryolservis" ASC-nin mətbuat xidmətindən Trend-ə verilən məlumata görə, "Qaynar xətt" fəaliyyət göstərdiyi son bir ay ərzində ( 19 oktyabr-19 noyabr) xüsusi telefon xəttinə 93 zəng daxil olub. Gələn zənglərin əksər hissəsi yolların təmiri, piyada zolaqlarının olmaması, yeraltı kommunikasiya xətlərinin çəkilişindən sonra bərpa işlərinin aparılmaması, işıqlandırma sistemlərində yaranmış problemlər, bəzi yerlərdə zəruri yol nişanlarının olmaması və intensiv yağışlardan sonra yollarda nəqliyyat vasitələrinin hərəkətində yaranmış problemlərlə bağlı olub.
Daxil olan zənglər operativ şəkildə Nəqliyyat Nazirliyi "Azəryolservis" ASC-nin növbətçiləri tərəfindən qeydə alınaraq, cəmiyyətin səlahiyyətlərinə aid olan məsələlərin həll edilməsi üçün aidiyyatı üzrə məlumatlandırma işləri aparılıb. "Qaynar xətt"ə daxil olmuş məlumatların əksəriyyəti operativ şəkildə cəmiyyətin əməkdaşları tərəfindən yerindəcə araşdırılaraq, problemin aradan qaldırılması istiqamətində işlər həyata keçirilib. Cəmiyyətin səlahiyyətlərinə aid olmayan zənglər isə müvafiq qurumlara yönləndirilib.
Qeyd edək ki, 2015-2016-cı illər payız-qış mövsümünə hazırlıq, payıq-qış mövsümündə avtomobil yollarının və yol qurğularının normal istismarını, hərəkətin fasiləsizliyini və təhlükəsizliyini təmin eymək məqsədilə Nəqliyyat Nazirliyi "Azəryolservis" Açıq Səhmdar Cəmmiyyətində tədbirlər planı hazırlanıb.
Tədbirlər planına əsasən avtomobil yollarında mövcud olan problemlərin operativ şəkildə həll eilməsi məqsədi ilə Nəqliyyat Nazirliyi "Azəryolservis" ASC-də sutkalıq növbətçilik yaradılıb. Növbətçinin daxil olan məlumatları qeyd edib cəmiyyətin tabeliyində olan şöbə və idarələrə çatdırılmasını təmin etmək məqsədilə (012) 599-79-75 nömrəli xüsusi telefon xətti, "Qaynar xətt" fəaliyyətə başlayıb. "Qaynar xətt" 24 saat ərzində daxil olan zəngləri qəbul edir.
