Bakı. Trend:
Sivilizasiyalar Alyansı Forumunun təşkilatçıları sırasına BMT-nin Sivilizasiyalar Alyansı, UNESCO, Dünya Turizm Təşkilatı, İSESCO və Avropa Şurası kimi nüfuzlu beynəlxalq təşkilatlar daxildir.
Mədəniyyət və Turizm Nazirliyindən Trend-ə verilən məlumata görə, bunu Sivilizasiyalar Alyansının Qlobal Forumu barədə BMT Radiosuna müsahibəsində Mədəniyyət və turizm naziri Əbülfəs Qarayev bildirib.
Nazir qeyd edib ki, bu forumun təşkilatçıları sırasına BMT-nin Sivilizasiyalar Alyansı, UNESCO, Dünya Turizm Təşkilatı, İSESCO və Avropa Şurası kimi nüfuzlu beynəlxalq təşkilatlar daxildir. Bu fakt müasir Azərbaycanın mədəniyyətlər arasında körpü salmaq, müxtəlif mədəni ənənələr arasında qarşılıqlı anlaşma səviyyəsini yaxşılaşdırmaq ənənələrinə və imkanlarına pozitiv baxışa dəlalət edir.
Ə.Qarayev vurğulayıb: "Sivilizasiyalar Alyansı Forumunun keçirilməsi bu gün dünyada baş verən bütün prosesləri qiymətləndirməyimiz üçün daha bir addım, daha bir imkandır. Təəssüf ki, bu proseslər heç də həmişə pozitiv xarakter daşımır. Zənnimcə bu gün dünyada gedən proseslərin çoxu mədəni ənənələri, baxışları, həyat tərzini, hər bir xalqa xas olan və əsrlər boyu formalaşmış müəyyən dini postulatları yetərincə düzgün başa düşməməyin nəticəsidir. Belə ünsiyyət bir-birimizi daha yaxşı anlamağa, münaqişələrin səbəblərini və köklərini təhlil etməyə, bu gün dünyada yaranmış mürəkkəb vəziyyətdən çıxış yolları tapmağa imkan verir".
Nazir bildirib ki, ilkin məlumata görə bir sıra beynəlxalq təşkilatların rəhbərləri həmin forumda iştirak etməyə maraq göstəriblər. BMT-nin Baş katibi Pan Gi Mun həmin forumda iştirak etmək arzusunu bildirib.