Bakı. İlhamə İsabalayeva - Trend:
Bu il Avropa regionunda 21 ölkədə qızılcanın, 20 ölkədə isə məxmərəyin eliminasiyasına (ləğvinə) nail olunub. Azərbaycanda isə hər iki xəstəliyin ləğvi qeydə alınıb.
Trend-in məlumatına görə, bunu Ümumdünya Səhiyyə Təşkilatının (ÜST) Azərbaycan nümayəndəliyinin yoluxucu xəstəliklər üzrə mütəxəssisi Cəvahir Süleymanova bu gün keçirilən tədbirdə deyib.
Hazırda dünyada Avropanın 3 regionunda məxmərək və qızılcanın ləğvinə nail olunmasının qarşıya məqsəd kimi qoyulduğunu deyən C.Süleymanova əlavə edib ki, dünyada qızılca və məxmərəyin ləğvinə nail olan ilk ölkə Amerika olub (2015-ci ildə).
C.Süleymanova qeyd edib ki, Avropa regionunda 18 ölkədə qızılca və məxmərəklə xəstələnmə baxımından vəziyyət endemik olaraq qalır: "Həmin ölkələr arasında Azərbaycana qonşu olan ölkələr - Rusiya, Gürcüstan, İran, Ermənistan da var. Orada hələ də virusların yayılması halları var. Bu da o deməkdir ki, xəstəliklər yenidən Azərbaycanda qeydə alına bilər. Ona görə də peyvəndləmə işləri bundan sonra da davam edəcək".