...

"RUN GROUP"dan Azərbaycan səhiyyəsinə töhfə - FOTO

Cəmiyyət Materials 9 Aprel 2018 15:02
Azərbaycanın tərəqqisi naminə fəaliyyətində bir sıra uğurlar qazanan "RUN GROUP" şirkəti çoxsaylı sosial layihələri çərçivəsində səhiyyə sisteminin inkişafına da töhfə verir.
"RUN GROUP"dan Azərbaycan səhiyyəsinə töhfə - FOTO

Trend-i buradan izləyin

Bakı. Trend:

Azərbaycanın tərəqqisi naminə fəaliyyətində bir sıra uğurlar qazanan "RUN GROUP" şirkəti çoxsaylı sosial layihələri çərçivəsində səhiyyə sisteminin inkişafına da töhfə verir. Bu məqsədlə şirkət tanınmış israilli tibb mütəxəssislərin iştirakı ilə Bakıda Azərbaycanın qabaqcıl həkim və cərrahları, ümumilikdə səhiyyəmiz üçün faydalı ola biləcək seminar təşkil edib.

Trend-in məlumatına görə, “RUN Group” şirkətinin təşkilatçılığı, Azərbaycan Tibb Assosiasiyasının dəstəyi ilə Bakıda “Müasir kardiologiya” mövzusunda elmi seminar keçirilib. Seminarda əsasən kardiologiya, kardio-radiologiya və qeyri-laborator ekspres analiz məsələlərinə həsr edilib.

Seminarda çıxış edən “Run Group” şirkətinin prezidenti İranə Talışxanova bildirib ki, tədbir Azərbaycan və İsrailin qabaqcıl tibb mütəxəssisləri arasında fikir mübadiləsinin gücləndirilməsinə və nəticədə insanların rifahına xidmət edəcək: "Dünyada ölümlə nəticələnən xəstəliklərin əksəriyyətinin ürək-damar sistemi ilə bağlıdır. Odur ki, səhiyyənin bu istiqamətini gücləndirmək, ölkə təbabətinə innovativ texnologiya və metodların daxil edilməsi, mütəxəssislərin təkmilləşdirilməsi, müalicə mərkəzlərinin ən yeni müayinə avadanlıqları ilə təmin edilməsi, əhaliyə göstərilən tibbi xidmətin keyfiyyətinin yüksəldilməsi zərurətə çevrilir. Bu risk faktoru öz kəskinliyinə görə bizim və israilli tərəfdaşlarımızın diqqət mərkəzindədir. Onlar İsrail təbabətinin çox qabaqcıl təbəqəsini təmsil edirlər".

İ.Talışxanova həmçinin bəyan edib ki, bu tədbir də öz işini ictimaiyyətə xeyir vermək missiyası üzərində quran RUN Group-un sosial fəaliyyətinin yalnız bir sahəsidir: "RUN GROUP artıq "Azərbaycanda gələcəyin səhiyyəsi və təbabəti" adlı yeni layihənin icrasına başlayıb. Şirkət yeni layihəsi ilə inkişaf etməkdə olan Azərbaycan səhiyyəsinin də ən qabaqcıl yerlərə çıxması üçün töhfəsini verməyə çalışacaq".

Başda Azərbaycan Tibb Assosiasiyasının sədri doktor Nəriman Səfərli, Azərbaycan Kardiologiya Cəmiyyətinin sədri, professor Tofiq Cahangirov olmaqla Azərbaycan səhiyyəsinin tanınmış simalarının iştirak etdiyi tədbirdə ürək xəstəliklərinin diaqnostikası və müalicəsindəki ən müasir yanaşmalar və tətbiq edilən texnologiayalar barədə ətraflı məlumat verilib.

Seminarda çıxış edən İsrailin Hadassa Dövlət Universitetinin Hospitalı, Ürək İnstitutunun Kardiologiya şöbəsinin professoru, invaziv kardioloq Boris Varşitski ST seqmentin yüksəlişi ilə müşahidə edilən miokard infarktında invaziv müalicə strategiyasından danışıb. O, son illər ərzində ürək çatışmazlığının bu seqmentinin öyrənilməsi və müalicəsi sahəsində qazanılmış dünya təcrübəsi barədə biliklərini bölüşüb.

İsrailin "Novamed" şirkətinin vitse-prezidenti, tibb sahəsində tanınmış mütəxəssis Qavriel Şalmiyev isə ekspress diaqnostikada innovativ texnologiyalardan istifadə, miokardın ürək hücumu ilə bağlı aktual məsələlərə toxunub. Q.Şalmiyev qeyri-laborator ekspres-analiz vasitələri, onların qeyri-klinik və qeyri-ambulator tətbiqi haqda danışaraq qeyd edib ki, bu çür avadanlıqlardan istifadə xəstəliyin inkişafının ev şəraitində proqnozunu verə və bununla da insanı yaxınlaşmaqda olan təhlükəli ağırlaşmalardan xilas edə bilər.

Seminarda Hadassa Dövlət Universitetinin Hospitalı, Ürək İnstitutunun azərbaycanlı həkimi İlqar Tahiroğlu da çıxış edib. O, "Transketeter aortik klapan implantasiyası: Yeni perspektivlər" mövzusunda danışıb.

Məruzəçilər onları diqqətlə dinləyən yerli mütəxəssislərin çoxsaylı ciddi elmi suallarını da cavablandırıblar. Qeyd edək ki, azərbaycanlı tibb mütəxəssislərinin sualları onların israilli həmkarlarının çox xoşuna gəlib.

Azərbaycan Kardilogiya Cəmiyyətinin sədri Tofiq Cahangirov qeyd edib ki, seminarda kardiologiyadakı yeniliklər barədə əldə edilən məlumatlar azərbaycanlı mütəxəssislər üçün çox faydalı olacaq:

"Ürək və qan-damar sistemi xəstəlikləri dünyada ölümün əsas səbəblərindən biridir. Bu gün keçirilən beynəlxalq tədbirdə qonaqlar kardiologiyada, xüsusən miokard infarktı, onun diaqnostikasında yeniliklər barədə geniş məlumatlar verdilər. Hər bir kardioluqun bu cür məlumatlara ehtiyacı var.
Bu gün Azərbaycanda səhiyyənin inkişafı göz qabağındadır. İnkişafın nəticəsi olaraq Azərbayacanda ürək və qan-damar xəstəliklərinin sayı azalmışdır. Bu xüsusilə, yeni klinikaların açılması, ölkəyə müasir texnologiyaların gətirilməsi və peşəkar kadrların yetişməsi nəticəsində mümkün olub. Bununla yanaşı, Azərbaycanda bilik və fikir mübadiləsi üzərində qurulmuş beynəlxalq tədbirlərin də keçirilməsi böyük önəm kəsb edir. Arzu edərdim ki, belə tədbirləri regionlarda da təşkil edək, elmi mübadilələr aparılsın və bizim kardioloqlar yeniliklərlə tanış olsunlar. Hazırda Azərbaycanda İsraildə gətirilmişlər də daxil olmaqla ən müasir tibbi texnologiyalar var. Seminarda bu yeni avadanlıqların özəlikləri, xüsusən də invaziv kardiologiyada innovasiyalar haqqında geniş məlumatlar verildi. Düşünürəm ki, burda əldə etdiyimiz məlumatlar mütəxəssislərimiz üçün çox faydalı olacaq".

İsrailin Hadassa Dövlət Universitetinin Hospitalı, Ürək İnstitutunun Kardiologiya şöbəsinin professoru Boris Varşitski yerli mətbuata açıqlamasında Azərbaycanda əməkdaşlıq üçün böyük perspektivlər gördüyünü deyib. "İsraildəki xəstəxanamızda Azərbaycandan bir neçə həkim işləyir və təcrübələrini artırır. Daha bir istiqamət bizim mütəxəssislərin azərbaycanlı həmkarları ilə birgə konsultasiya və konsilium aparması ola bilər. Yeni dərmanların öyrənilməsi və tədqiqatların aparılması da mümkün əməkdaşlığımızın bir sahəsidir. Bakıya səfərimizin məqsədi də burdakı həkimlərlə, xüsusilə, kardioloqlarla, invaziv radioloqiya mütəxəssisləri ilə tanış olmaq, əməkdaşlığın mümkün yollarını müzakirə etmək, təcrübəmizi zənginləşdirmək və ola bilsin, yeni texnoloji elementlərin yaradılması üzərində işləməkdir. Azərbaycanda çox isti qəbul edildik, yeni insanlarla tanış olduq. Burda əməkdaşlığımız üçün böyük perspektivlər görürük," - deyə israilli kardioloq bildirib.

Hadassa Dövlət Universitetinin Hospitalı, Ürək İnstitutunun azərbaycanlı həkimi, invaziv kardioloq İlqar Tahiroğlu da öz xaricdə qazandığı bilik və təcrübələrini öz Vətənində soydaşları ilə bölüşməkdən qürur hissi keçirdiyini bildirib: "Seminarda açıq ürək əməliyyatı olmadan qasıqdan girərək ürək qapağını dəyişmə əməliyyatı haqqında məlumat verdim. Oradakı təcrübəmi öz həkimlərimizə də çatdırmağa çalışdım. Bununla çox böyük qürur duydum".

Qeyd edək ki, seminarın təşkilatçısı "Run Group" şirkəti Azərbaycanda əsasən qeyri-neft sektoruna investisiyaların cəlb olunmasına çalışır və bir sıra sahələrdə ardıcıl uğurlar qazanmaqda davam edir.

Şirkətin prezidenti İ.Talışxanova deyib: "Böyük maraqla qarşılanmış, əsaslı fikir və təcrübə mübadiləsinə çevrilən bu seminar şirkətimizin yeni ənənəsinin bünövrə daşıdır. Biz, bu təşəbbüslə öz yeni, tibbi-sosial iş istiqamətimizi yaradırıq. RUN GOUP olaraq bu işin davamı kimi bu cür tədbirlərin mütəmadi olaraq Bakı ilə yanaşı bölgələrdə də keçirilməsini, təcrübə mübadiləsi üçün xaricdən digər tibbi profilli mütəxəssislərin də dəvət edilməsini, ümumilikdə səhiyyəmizə bu və ya digər formada öz töhvəsini verməyi planlaşdırırıq.

Digər sosial sahələrdə olduğu kimi, şirkətimizin bu sahədəki fəaliyyəti ölkəmizə cəlb etdiyimiz xarici sərmayələrin üzrəində qurulmuş layihələr hesabına həyata keçirilir.

Azərbaycanın inkişafının yeni yol xəritəsi və bununla bağlı atılan addımlar ölkədə işgüzarlıq və sərmayə yatırımlarının həyata keçirilməsini daha da asan və rahat edir. Biz bu cür mühitdən yararlanaraq xalqımıza, Vətənimizə, dövlətə və dövlətçiliyimizə dəstək olmağa çalışdığımızı bildirmək istəyirik".

Məqalədə:
Xəbər lenti

Xəbər lenti