Bakı. Trend:
Bu il aprelin 1-dək Ədliyyə Nazirliyinin qeydiyyat şöbələrinə 378 cütlük boşanmaq üçün müraciət edib.
Trend-in məlumatına görə, bunu Ədliyyə Nazirliyinin İnsan Hüquqları və İctimaiyyətlə Əlaqələr İdarəsinin sədri Aynur Sabitova Ədliyyə Nazirliyi, UNİCEF və Mediasiya Şurasının birgə tərəfdaşlığı ilə 1 İyun Uşaqların Beynəlxalq Müdafiəsi Gününə həsr edilən Mediasiya prosesləri zamanı ailə mübahisələrinin həllində uşaq hüquqlarının müdafiəsi məsələlərinin aktuallığı mövzusunda keçirilən tədbirdə deyib.
O bildirib ki, ötən il 1748 cütlük müraciət edib.
"Ədliyyə Nazirliyinin qeydiyyat şöbələrində fəaliyyətə cəlb edilmiş
psixoloqların apardıqları danışıqlar nəticəsində ötən il 268 cütlük
boşanmaqdan imtina edib. 2020-ci ildə boşanmaq üçün müraciət edən
1108 cütlükdən 108-i, 2019-cu ildə isə müraciət edən 1269 cütlükdən
254-ü boşanmaqdan imtina edib", - A.Sabitova bildirib.