Bakı. Trend:
Azərbaycan Memarlıq və İnşaat Universitetində (AzMİU) 2022/2023-cü tədris ilinin yaz semestrinin imtahan sessiyası çərçivəsində valideynlər üçün “Açıq qapı” günü keçirilib.
Trend xəbər verir ki, “Açıq qapı” günündə Nəqliyyat, Su təsərüfatı və mühəndis kommunikasiya sistemləri, İnşaat və Memarlıq fakültələrində təhsil alan tələbələrin valideynləri iştirak ediblər, həmçinin media nümayəndələri iştirak ediblər.
Əvvəlcə AzMİU-nun rəhbərliyi, İmtahan Qərargahının nümayəndələri
və ictimai, eləcə də tələbə təşkilatlarının rəhbərləri ilə görüş
keçirilib. Görüşdə AzMİU-nun rektoru professor Gülçöhrə Məmmədova
çıxış edərək imtahan prosesi haqqında məlumat verib. Rektor
imtahanların gedişində şəffaflıq və obyektivliyin təmin edilməsi
istiqamətində görülən işlərdən, həmçinin imtahanların keçirilməsi
qaydaları, biliyin qiymətləndirilməsi meyarları və müraciətlərə
baxılma mexanizmlərindən danışıb.
Sonra valideynlərin və media nümayəndələrinin sualları
cavablandırılıb.
Görüşdən sonar birgə imtahan prosesi izlənilib. Xüsusi ayrılmış zallarda test və yazılı imtahanların gedişini izləyən valideynlər, eyni zamanda yazılı imtahanların şifrələnmə otağında olub, prosesə canlı şahidlik ediblər.
İyunun 1-dən etibarən Azərbaycan Memarlıq və İnşaat Universitetində (AzMİU) yaz semestrinin imtahan sessiyasına start verilib. İmtahan sessiyası iyulun 5-dək davam edəcək.
İmtahanlarda ümumilikdə 8000-dən çox tələbə iştirak edir. Təsdiq olunmuş imtahan cədvəlinə uyğun olaraq tələbələr yazılı, test üsulları, qabiliyyət tələb edən fənlər üzrə isə ənənəvi qaydada fakültələrdə imtahan verirlər.
Bütün imtahanlar mərkəzləşdirilmiş qaydada keçirilir.
İmtahanların nəticəsindən yarana biləcək narazılıqların, neqativ halların mövcud qaydada araşdırılması və həll edilməsi məqsədi ilə AzMİU-nun rəhbər və məsul şəxslərindən, universitetdə fəaliyyət göstərən ictimai təşkilatların nümayəndələrindən ibarət İmtahan Qərargahı yaradılıb. Bundan əlavə, imtahan sessiyası dövründə birbaşa rektorun sədrliyi ilə yaradılmış Münaqişə (Apellyasiya) Komissiyası da fəaliyyət göstərir. Burada imtahanların nəticələri barədə müraciətlərə baxılır və aşkar edilmiş çatışmazlıqlar aradan qaldırılır.
